Тараптар сауда мәселесінде бір шешімге келе алмаған.
АҚШ Үндістан тауарларына 50 пайыздық кедендік баж салығын енгізді. Бұл туралы Reuters жазды, деп хабарлайды inbusiness.kz сайты.
Тиісті шешім 27 тамыз күні күшіне енді. Үндістанның Ресейден мұнай сатып алуы Вашингтонның жаңа шектеу шараларын қабылдауына себеп болған. Ақ үй Нью-Делидің сауда саясаты санкциялық режимді бұзып отырғанын алға тартады, сонымен қатар Батыстың энергетикалық қауіпсіздігіне қатер төндіреді деп отыр.
Бұған дейін АҚШ пен Үндістан бес раундтық кездесу өткізді. Алайда тараптар нақты келісімге келе алмады. Вашингтон өз ұстанымынан бас тартпайтынын білдірген.
Үндістан үкіметі жаңа тарифтен зардап шегетін ұлттық экспорттаушыларды қолдауға бағытталған шараларды әзірлеуді бастап та кетті. Олардың қатарында экспорт бағыттарын Қытай, Латын Америкасы және Таяу Шығыс елдеріне бұруды көздейтін нормалар да бар.
Айта кететіні, бұған дейін Үндістан АҚШ-тың қысымынан соң Ресей мұнайын сатып алуды азайтатынын жазған болатынбыз.
