Бүгін Үкіметте Премьер-министр Олжас Бектеновтің төрағалығымен Цифрлық штаб отырысы өтті. Онда Мемлекет басшысының цифрландыру саласындағы алға қойған міндеттерін жүзеге асыру бағытында бірқатар шешім қабылданды, деп хабарлайды Egemen.kz.
Қабылданған шешімдерге сәйкес:
- 15 қыркүйектен бастап Aitu, eGov, eGov Business, eOtinish сервистері мен мемлекеттік ақпараттық жүйелерге қол жеткізу үшін нөлдік тарифтеу қолданылады;
- 20 қыркүйекке дейін Smart Bridge платформасында бизнеске өз IT-шешімдерін мемлекеттік қызметтермен еш кедергісіз біріктіруге жағдай жасалады;
- Ірі жобаларды іске асыру мақсатында Qaztech платформасында IT-шешімдердің құнына қатысты және автоматтандырылған функциялар санына қойылған шектеулер алынып, құқықтық актілерге өзгерістер енгізіледі;
- Жыл соңына дейін мемлекеттік қызметтерді жасанды интеллект негізінде цифрландыру тапсырылды.
Айта кетейік, нөлдік тарифтеу тетігі азаматтардың мобильді балансы нөл немесе теріс болған күннің өзінде де мемлекеттік ресурстарға еркін кіруін қамтамасыз етеді.
«Мұндай қадам Халыққа қызмет көрсету орталықтарына түсетін жүктемені айтарлықтай азайтуға мүмкіндік береді және digital by default форматына көшудің маңызды кезеңіне айналады. Бірқатар шет елдерде осыған ұқсас тетіктер қазірдің өзінде бар. Эстонияда X-Road және e-Services платформаларына тегін қолжетімділік қамтамасыз етілген, Сингапурда телекоммуникация операторлары SingPass, Gov.sg, MyInfo қызметтеріне нөлдік трафик ұсынады», деп хабарлады Үкіметтің баспасөз қызметі.
Smart Bridge платформасы арқылы жеке IT-шешімдердің мемлекеттік қызметтерге интеграциясы инновацияларды енгізіп қана қоймай, дербес деректерді қорғау талаптарын сақтай отырып, мемлекет пен бизнес арасындағы өзара іс-қимылды жаңа деңгейге шығарады. Қазірдің өзінде бұл жүйе арқылы 14,6 мыңнан астам өтінім қабылданған.
Сонымен қатар, Qaztech платформасында бұрынғы шектеулер жойылады. Бұған дейін өнім әзірлеудің құны 15 мың АЕК-тен аспауы, мерзімі 6 айдан артық болмауы және автоматтандырылған функциялардың саны үштен аспауы тиіс еді. Енді жаңа тәсіл ауқымды әрі кешенді шешімдерді жедел іске асыруға мүмкіндік бермек, бұл өз кезегінде отандық цифрлық технологиялардың дамуына жол ашады.
Қазіргі таңда 1 408 мемлекеттік қызметтің 368-і толық автоматтандырылған. Тағы 984 қызметті цифрландыру мүмкіндігі бар, ал 56 қызмет қазірдің өзінде проактивті форматқа көшірілген. Жасанды интеллектіні енгізу мемлекеттік қызметтердің сапасын арттырып, оларды проактивті түрде ұсынуды кеңейтуге ықпал етпек.
