Бұл туралы Туризм және спорт министрлігі хабарлады.
Алдағы жылдары жергілікті бюджет пен инвестиция есебінен 667 жаңа балалар футбол алаңы салынады, деп жазады inbusiness.kz сайты.
Ведомство таратқан ақпаратқа сәйкес бүгінде елде 8,4 миллионнан астам адам жүйелі түрде спортпен айналысады, оның ішінде 1,55 миллионы – балалар.
– Мемлекеттік тапсырыс аясында 240 мың бала 7 мыңға жуық секцияға тегін қатысып жүр. 2025 жылдан бастап алты қалада ваучерлік қаржыландыру жүйесі енгізілді. Соңғы бес жылда 371 спорт нысаны пайдалануға берілсе, биылдың өзінде 32 нысан іске қосылды, – делінген министрлік таратқан хабарламада.
Жыл соңына дейін тағы 70 нысан құрылысын аяқтау жоспарланып отыр.
Олардың қатарында Астанадағы Ұлттық спорт университеті, Түркістандағы есу каналы және Қызылордадағы көпбейінді стадион бар.
