Алматылық "Қайрат" футбол клубы жанкүйерлеріне зор қуаныш сыйлады!
UEFA Чемпиондар лигасының плей-офф кезеңінде қазақстандық команда шотландиялық алып "Селтикті" тізе бүктіріп, тарихта алғаш рет турнирдің негізгі кезеңіне жолдама алды.
Бұл маусымда "Қайрат" нағыз қайсар мінез танытып келеді. Алғашқы іріктеу кезеңдерінен бастап қарсыластарына еш мүмкіндік бермей, сенімді ойын көрсетті.
Словенияның "Олимпиясын" жарыстан шығарса, Финляндияның мықты КуПС клубын да жолда қалдырды. Словакияның "Слованымен" өткен тартысты кездесуде пенальти сериясында суырылып шығып, жанкүйер жүрегін дүр сілкіндірген еді.
Ал шешуші матчта алматылықтардың нағыз ерік-жігері байқалды. Құрамдағы негізгі ойыншылардың кейбірі алаңға шыға алмаса да, команда берілмеді. Жас дарын Дастан Сәтпаев ойыннан тыс қалса, шабуылшы Эдмилсон да қатарда болмады. Дегенмен жарақатынан айыққан Луиш Мата негізгі құрамнан табылып, қорғаныста нағыз тірекке айналды.
Ойын өте шиеленісті өтті. Қос тарап алғашқы минуттардан гол соғуға тырысқанымен, есеп ашылмады. Екі матч қорытындысы 0:0 есебімен аяқталды. Жеңімпазды анықтау пенальти сериясына қалды.
Сол сәтте "Қайрат" жігіттері жанкештілікпен шеберлігін көрсетті! Пенальтиде салқынқанды ойнаған алматылықтар қарсыласын қапы қалдырып, басты мақсатқа қол жеткізді. Қақпашы Темірлан Анарбеков пенальти сериясында 3 бірдей соққыны қайтарып, "Қайраттың" тарихи жеңісінің басты қаһарманына айналды.
Бұл жеңіс – тек "Қайрат" жанкүйерлерінің ғана емес, бүкіл Қазақстан футболы үшін тарихи оқиға!
