Қызылорда облысының Арал ауданында бірқатар әлеуметтік нысан пайдалануға берілді.
Сексеуіл кентінде «Келешек мектебі» ашылса, Арал қаласында балаларға арналған оңалту орталығы жұмысын бастады. Сонымен қатар Тоқабай ауылының оқушылары үшін 100 орындық білім ошағы есігін ашты. Салтанатты шараға облыс әкімі Нұрлыбек Нәлібаев қатысты.
«Келешек мектептері» жобасы аясында салынған кезекті оқу ошағы Сексеуіл кентінде ашылды. Бұл аталған жоба аясында өңірде пайдалануға берілген жетінші мектеп. 300 орынға лайықталған білім ұясында балалардың сапалы білім алуына барлық жағдай жасалған.
Нұрлыбек Нәлібаев, облыс әкімі:
- Мемлекет басшының арманы ауылдық жердегі халыққа жағдай жасау. Мектепті өздеріңіз көресеңіздер, ішінде білім аламын, спортпен, шығармашылықпен айналысамын деген балаларымызға барлық жағдай жасалған.
Тағы бір әлеуметтік маңызды нысан Арал қаласында ашылды. Аудандағы ескі ғимарат облыстық бюджет есебінен қайта жаңғыртылып, балаларға арналған «Қамқорлық» оңалту орталығына берілді. Ал медициналық құрал-жабдықтар «Қазақстан халқына» қоры есебінен алынды.
Олжас Ысқақов, Денсаулық сақтау басқармасының басшысы:
- Орталықта логопед, механотерапия, дефектолог мамандары бар. Сонымен қатар тұзды шахта, оңалтуға қажетті емнің барлық түрі қамтылған.
Арал ауданына жұмыс сапарымен барған облыс әкімі Нұрлыбек Нәлібаев Тоқабай елді мекенінде 100 орындық жаңа мектептің ашылуына қатысты. Бұрынғы мектеп ғимараты 2015 жылы салынғанымен көп ұзамай апатты деп танылды. Бұл мәселе демеушілік қолдау арқылы шешілді. Жеке инвестор 550 млн теңге бөліп, былтыр жаңа оқу корпусы салынды. Биыл асхана мен спорт залдың құрылысы аяқталып, толық пайдалануға берілді.
Нұрлан Жақыпбеков, Нұржан Мұзарапшин, Ақан Әлиев, 24KZ
