Бірнеше жыл бойы өгей ұлын ұрып-соғып, жертөлеге қамап, қорлық көрсеткен ер адам шартты жаза алды.
Жамбыл облыстық сотының бұл шешімі баланың туған әкесінің ашу-ызасын тудырды, деп хабарлайды Caravan.kz медиа порталы.
Қоғам белсендісі Оңғар Қабден осыған пікір білдірді. Тергеу дерегінше, ол өгей баласын жүйелі түрде сабап, аштан қинап, қол-аяғын байлап, сарай мен жертөлеге қамап отырған. Бірде тіпті ерітіндіге батырып, тұншықтырмақ болған.
Азаптың бір себебі — баланың кәмпит жеп қойғаны болған.
Тергеушілердің айтуынша, баланың анасы аудандық білім бөлімі қызметкері Гүлмира Маденова, күйеуінің әрекетін біліп қана қоймай, қолдап отырған. Мектеп әкімшілігі де оқушының мектепке бармай жүргенін елемей, тек тәртіптік жаза алған.
Бір жыл бұрын бала үйінен қашып шыққан. Оны ауыл тұрғындары тауып алған кезде, құлағында, мойнында және денесінде көптеген жарақат, қолдарында көгерген іздер болған.
Бұған дейін Жуалы аудандық соты өгей әкені 4 жылға бас бостандығынан айыру жазасын кескен еді.
Алайда апелляциялық сотта Жамбыл облыстық сотының қылмыстық істер жөніндегі сот алқасының төрағасы Нұрмұхамат Абидов бапты өзгертіп, жазаны шартты мерзімге ауыстырды.
Айта кетейік, Жамбыл облысында тағы да Көктал ауылындағы ағайынды балаларға жасалған бірнеше жылдық зорлық-зомбылық дерегі бойынша тергеу жүріп жатыр. Жақында олардың анасы да агрессорды ақтауға тырысқан.
Көкталдағы балалар құлдығына имам мен әкімнің не қатысы бар?
Жамбыл облысы Көктал ауылында ағайынды балаларды бірнеше жыл бойы құлдықта ұстаған өгей әкенің қорлығы жайлы ақпарат тарағанда жұрт жағасын ұстады. Туыстары тек өгей әкесін ғана емес, сонымен бірге, балалардың құлдықтағы өмірі мен оларды аяусыз соққыға жығылғанын біле тұра араласпаған жергілікті әкім мен имамды да жауапқа тартуды талап етті. Orda.kz тілшісі осы оқиғаның егжей-тегжейін анықтап көріпті.
2025 жылы 6 тамызда Талас ауданы Көктал ауылының тұрғыны полицияға арызданып, қой бағып жүрген үш баланың жоғалғанын айтқан. Келесі күні балалар Алматыдағы туған әкесі мен анасының әпкесінің жанынан табылды. Артынша балалар Таразға жеткізіліп, тұрмыстық зорлық-зомбылық құрбандарына арналған облыстық әлеуметтік көмек орталығына уақытша орналастырылды.
Балалардың анасының бірінші некеден туған ұлдарынан бөлек тағы үш кішкентай баласы бар екен. Сот шешімімен құлдықта ұстап балаларды ұрып-соққан өгей әкесі екі айға қамауға алынды. Істі аймақтық полиция департаментінің тергеу басқармасы тергеп жатыр.
«Әкім мен ауыл имамы балалардың азапқа толы өмірі жайлы білген»
Ағайынды бауырлардың бейнежазбасы өткен аптада желіде желдей есіп кетті. Олардың көрген қорлығын естісеңіз жағаңызды ұстайсыз. Тіпті үлкені өзіне қол жұмсауға дейін барғысы келетінін айтты. Олар күн ұзақ қой бағып қолдарында не телефон жоқ, не сағат жоқ, жолда өткен-кеткеннен сағат пен көмек сұрап жалтақтап қорқыныш пен қорлықта өмір сүрген.
«Біздің осылай бес жыл бойы қорлық көріп келеміз, аяусыз қамшымен ұрып-соғады. Денемнің бәрі жара. Өзімнің туған әкеме кеткім келді. Анам да ештеңе жасай алмайды. Күйеуінен қорқады. Егер бізге қазір біреу қол ұшын беріп мына жағдайдан құтқармаса, екеуміздің біріміз өлеміз», — деді 16 жастағы жасөспірім.
10 жастағы екінші бала Ұзақбай да көмек сұрады. Ол негізінен төртінші сыныпта оқуы керек, бірақ екінші сыныпта қалып қалған не санауды, не оқуды білмейді.
Балалардың әпкесінің айтуынша, Көктал ауылының әкімі мен жергілікті имам жағдайды білгенімен, ешқандай шара қолданбаған.
«Біздің ісіміз бұрмаланып жатыр. Талғар мен Таразда балаларға сараптама жасалды. Нәтижесінде қорлау фактілерін растады. Бірақ анасы азаматтық күйеуін қолдап отыр. Көктал ауылының әкімі Қайрат мырза жағдайды білген. Олардың үйінде жергілікті мешіттің имамы да болды, ол да болып жатқан сұмдықтарды естіген. Соған қарамастан сыйлық алып, үйлерінде болыпты. Мен әкім мен имамды жауапқа тартуды талап етемін. Тіпті көршілер де білді, барлығы немқұрайлылық танытқан. Үлкені колледж студенті ретінде есепте тұрды, бірақ бұл тек ресми ғана болды. Шындығында барлық шәкіртақы 120 мың теңгені өгей әкесі алып отырды. Неге оқытушылар бала қайда деп сұрамады? Барлығы білді, бірақ үнсіз қалды!» — дейді ашынған әйел.
Сонымен қатар, балалардың әпкесінің айтуынша, тергеушілер жағдайды жеңілдетуге тырысып, балаға тек ғана тамақ берілмей жүріп-тұруына шектеу болған кезді ғана құлдық деді деп оларға айдалада қой бақтырып, ұрып-соққанын іске қоспай отыр.
«Балалар үш күннен бері дағдарыс орталығында отыр. Ешқандай көмек көрсетілмейді. Тергеушілер бізге құлдық болған жоқ деп сендіруге тырысты. Бірақ балаларды бес жыл бойы ұрып-соғып, ауыр жұмыстарға мәжбүрлегені ақиқат. Біз тергеуге көңіліміз толмайды. Көмек жоқ», — деді туысы.
Бұған дейін екі бала зардап шеккені жайлы хабарланған едік. Артынша үш бала екендігі анықталды.
«Бұл менің егіз бауырым. Біз туған әкемізге кеткіміз келеді. Кіші бауырымды да алып кеткіміз келеді. Себебі оны балалар үйіне бермекші. Біз оған қарсымыз», — дейді 16 жастағы жасөспірім президенттен көмек сұрап.
Жамбыл облысының әкімі Ербол Қарашүкеевтің тапсырмасымен оның орынбасары тікелей бақылайтын жұмыс тобы құрылды. Ол жағдайды зерттеп, балалардың қауіпсіздігін қамтамасыз етеді. Сондай-ақ, өңірдегі барлық білім беру мекемелерінде тексеру жүргізу жоспарланып жатыр.
Полиция мәлімдемесінде қылмыстық іс қозғалған және «әртүрлі зорлық-зомбылық әрекеттері, әсіресе кәмелетке толмағандарға қатысты болса, қатаң түрде тоқтатылатыны» айтылды.
