Бұл туралы Жапония министрлер кабинеті бас хатшысы Ёсимаса Хаяси мәлімдеді, деп хабарлайды ТАСС, деп жазады inbusiness.kz сайты .
Жапония үкіметі Шығыс Қытай теңізіндегі даулы аумақта жаңа құрылғы салу жоспарына байланысты Қытайға ресми наразылық жолдады.
– Біз Қытайдың Шығыс Қытай теңізінен шығысқа қарай тағы бір құрылғы орнату жоспары бар екенін білеміз. Ерекше экономикалық аймақтар мен құрлықтық шельфтің шекарасы әлі нақты анықталмай тұрғанда, мұндай біржақты қадамдарға барғандарына қынжыламыз, – деді Хаяси. Оның айтуынша, Жапония өз қарсылығын дипломатиялық арналар арқылы жеткізген.
Токио мұндай наразылықтарды Қытайдың әрекетіне байланысты жиі білдіріп келеді. Жапон тарапының пайымдауынша, Қытай екі елдің экономикалық аймақтарын бөліп тұрған шартты сызық бойында бұрғылау жұмыстарын жүргізіп жатыр. Жапония мұны теңіз түбіндегі газ кен орындарын игеру әрекеті деп санайды, ал бұл орындарға Жапонияның да құқы болуы мүмкін.
Ресми мәліметке сәйкес, Қытай бұл аймақта 20 тұрақты бұрғылау қондырғысын қолданып отыр. Алайда Қытай Жапония ұсынған шектеу сызығын мойындамайды және ол сызық шығысқа қарай, Жапонияның оңтүстігіндегі Окинава аралдарына дейін өтуі керек деп есептейді. Халықаралық құқық бойынша мұндай даулар тек екіжақты келіссөздер арқылы шешілуге тиіс.
Айта кетсек, 2008 жылы Токио мен Бейжің Шығыс Қытай теңізіндегі газ кен орындарын бірлесіп игеру туралы келісімге қол қойған еді. Алайда келіссөздер 2010 жылы Жапония жағалау күзеті Сенкаку (қытайша – Дяоюйдао) аралдары маңында Қытай балық аулау кемесін ұстағаннан кейін тоқтап қалды. Бұл аралдар бүгінде де екі ел арасындағы аумақтық даудың өзегінде тұр.
