Жетісу облысында тұрғын үйлердің құрылысы кезінде бюджет қаражаты қолды болған , — деп хабарлайды Massaget.kz тілшісі.
2021 жылы тапсырыс беруші мен мердігер ұйым арасында жалпы сомасы 1,7 млрд теңгеге екі көпқабатты тұрғын үй салуға келісімшарт жасалған. Алайда қол қойылған орындалған жұмыстар актілеріне қарамастан, құрылыс-монтаж жұмыстары жасалмаған.
"Жоспарланған тоғыз қабаттың тек жетеуі тұрғызылған, жылыту, сумен жабдықтау, жарықтандыру жұмыстары жүргізілмеген, сонымен қатар, сыртқы әрлеу жұмыстары жоқ. Осылайша құрылыс аяқталмай, нысанды пайдалануға беру мерзімі кешіккен", — деп жазылған хабарламада.
Мемлекетке келтірілген шығын 152 млн теңгеден асқан. Сот санкциясымен құрылысшы компанияның мүлкіне тыйым салынды.
Іс бойынша күдікті деп мердігер ұйымның директоры және құрылысқа техникалық қадағалау жасаған компания қызметкерлері танылды.
Тергеу жалғасып жатыр.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
