Ақтөбеде өңірге қажетті медицина мамандарын даярлауға бөлінген білім беру гранттарының иегерлері анықталды. Барлығы 87 өтініш қабылданған, деп хабарлайды облыс әкімдігіне сілтеме жасаған KAZ.NUR.KZ.
Ведомствоның мәліметінше, 25 тамызда облыс әкімі Асхат Шахаровтың төрағалығымен жергілікті бюджеттен бөлінетін гранттардың иегерлерін анықтау бойынша комиссия отырысы өткен. Комиссия мүшелері құжаттарды қарай келе, төмендегідей шешім шығарған.
"Бакалавриат" бағыты бойынша бөлінген 5 орынға 41 өтініш түскен, медицина мамандығына – 22, педиатрия мамандығына – 11, стоматология мамандығына 8 талапкер құжат тапсырған.
"Педиатрия" мамандығы бойынша екі үміткердің арасында бірдей конкурстық балл көрсеткіші тіркелген. Яғни екеуінің де жинаған балы – 98, екеуі де үздік аттестатқа ие, сондай-ақ қалалық, облыстық және республикалық олимпиадалардың жеңімпаздары.
Әділдік және тең мүмкіндік қағидаттарын сақтау мақсатында екі абитуриентке де жергілікті атқарушы органның грантын тағайындау туралы шешім қабылданған.
"Резидентура" бағыты бойынша бөлінген 45 орынға 46 өтініш түскен. 18 мамандыққа талапкерлер құжат тапсырса, көрсетілген 9 мамандыққа үміткерлер өтініш білдірмеген. Сондықтан бос грант орындары қайта бөлінген.
Атап айтқанда, акушерия және гинекологияға (ересектер, балалар) екі орын, офтальмологияға (ересектер, балалар) үш, радиологияға төрт, физикалық медицина және реабилитацияға үш, эндокринологияға (ересектер, балалар) бір, аллергология және иммунологияға (ересектер, балалар) бір, психиатрияға (ересектер, балалар) бір орын бөлінген.
Жергілікті грантқа үміткерлерден құжат қабылдау Марат Оспанов атындағы медицина университетінің базасында жүргізілген.
Грант иегерлерінің тізімін сілтемеге өтіп көреуге болады.
Мәтіннен қате тапсаңыз, бізге жазыңыз
