Андрей Панаев бір жылдан астам уақыттан бері көл маңын ерікті түрде қоқыстан тазартып келген .
Қырғызстан президенті Садыр Жапаров Ыстықкөл жағалауындағы қоқысты ерікті түрде тазалауымен танылған экоактивист Андрей Панаевті қабылдап, оған көлік тарту етті, деп хабарлады Қырғызстан президентінің баспасөз хатшысы Аскат Алагозов.
Садыр Жапаров Андрей Панаевтің ерікті түрде қоқыс жинап жүргенін интернеттен көріп, оған алғысын білдіруді жөн көргенін айтты.
"Сіздің жасап жүрген ісіңіз – көпшілікке үлгі. Экология мен табиғаттың шекарасы жоқ. Біз Жер шарында бір ауамен тыныстаймыз. Сондықтан жер бетіндегі әр адам сіз сияқты әрекет етуі керек. Табиғатты таза сақтап, оны келер ұрпаққа аманаттап қалдыру – әрбір адамның міндеті. Сіз – нағыз азаматсыз!" – деді Садыр Жапаров.
Экоактивист Қазақстаннан Қырғызстанға саяхаттап келгенін және 2024 жылы Ыстықкөлге демалуға келіп, көл жағалауындағы қоқысты тазалап, осы әрекеті арқылы басқаларды тазалық сақтауға шақырғысы келгенін айтты. Андрей Панаев "Қырғызстан – менің үйім" деп, елде тұрақтап қалуға шешім қабылдағанын жеткізді.
Сондай-ақ, ол Президент Садыр Жапаровтың қоқыс жинап, халықты тазалыққа шақырған видеоларын көргенін айтып, мемлекет басшысының бұл әрекеті өзгелерге үлгі болып отырғанын ерекше атап өтті.
Оқи отырыңыз:
Қырғызстанда бүкіл ел азаматтарына арналған Ар-намыс кодексі қабылданады
Қырғыз парламенті мемлекеттік тіл туралы заң жобасын мақұлдады. Тіл білмегендер енді шенеунік бола алмайды
