Алайда, бірқатар елді мекен тұрғындары интернет сапасына қатысты шағымданып жатыр
Бұл туралы Caravan.kz медиа порталы Sputnik.kz-ке сілтеме жасап хабарлайды.
2027 жылға дейін Шығыс Қазақстан облысының Марқакөл ауданындағы барлық елді мекенде интернет сапасы жақсарады, деп хабарлады облыс әкімдігі.
Марқакөл ауданындағы интернет мәселесі кезең-кезеңімен шешіліп жатқаны жөнінде аймақ басшысы Нұрымбет Сақтағанов тұрғындармен кездесуде мәлімдеді.
Бүгінде Марқакөл ауданы халқының 82,4%-ы интернетке қол жеткізе алады. Биылғы жылдың наурыз айында Шеңгелді және Игілік ауылдарына мобильді интернет қосылды.
«Алайда, бірқатар елді мекен тұрғындары интернет сапасына қатысты шағымданып жатыр. Ол ауылдарда шамамен 1262 адам тұрады. Аталған ауылдардағы мәселе байланыс операторларымен бірлесіп, 2027 жылдың соңына дейін кезең-кезеңімен шешілетін болады», — деп жазылған хабарламада.
Сонымен қатар, ауданның 12 мектебінде Starlink жүйесі арқылы жоғары жылдамдықты интернет жүргізіліп жатыр, дейді әкімдіктегілер. Бұл шалғайдағы ауылдардағы оқушылар үшін қашықтан білім алуға мүмкіндік береді.
