Түркияның ең танымал туристік өңірлерінің бірі – Каппадокияда шетелдік қыздың әрекеті үлкен дау туғызды, деп жазады inbusiness.kz сайты.
Ол ЮНЕСКО-ның дүниежүзілік мәдени және табиғи мұралар тізіміне енген Үчхисар қамалының төбесіне шығып, онда орнатылған түрік туы ілінген бағананы тірек етіп, акробатикалық қимылдар жасаған.
Әлеуметтік желіге тараған бұл бейнежазба жергілікті жұртшылықтың ашуын тудырды. Невшехир провинциясы губернаторының әкімдігі мәлімдеме жасап, оқиғаға байланысты туристке қатысты тергеу басталғанын хабарлады.
Бұл жағдайға саясаткерлер де үн қосты. Әділет және даму партиясының депутаты Эмре Чалышкан өзінің әлеуметтік желідегі жазбасында оқиғаны қатты айыптады.
– Ту – біздің намысымыз, қасиетті құндылығымыз. Оған құрметсіздік танытқандарға міндетті түрде шара қолданылуы тиіс. Біз Каппадокияда келген қонақтарды әрдайым жылы қарсы аламыз, алайда ұлттық әрі рухани құндылықтарымызға қол сұғуға жол бермейміз, – деді ол.
Невшехирдің бас прокуратурасы Түркия Қылмыстық кодексінің 300 және 301-баптары бойынша сотқа дейінгі тергеу жүргізіп жатыр.
Бұл баптар 3 жылға және 2 жылға дейін бас бостандығынан айыру жазасын қарастырады.
Әзірге туристің қай елдің азаматшасы екені және оның қазіргі қайда жүргені белгісіз.
