Париждіктер Франция Кубогының финалында "Реймсті" талқандап, маусымды үш дүркін жеңіспен аяқтады.
Париждік клуб тағы бір мәрте өзінің мықтылығын паш етті. 24 мамырда Сен-Дени қаласындағы әйгілі "Стад де Франс" стадионында өткен Франция Кубогының финалында ПСЖ "Реймс" командасына еш мүмкіндік қалдырмай, 3:0 есебімен жеңіп шықты. Бұл жай ғана жеңіс емес. Бұл француз футболындағы биылғы маусымның шарықтау шегі.
Футбол әлемі бұл кеште ПСЖ-ның жоғары деңгейдегі өнерін тамашалады. Жас жұлдыз Брэдли Баркола алғаш 16-минутта есеп ашты. Арада үш-ақ минут өтпей жатып, ол дубль жасап үлгерді. Қос голға да керемет пас берген Дезире Дуе.
Ал, алғашқы таймның соңында Баркола бұл жолы пас беруші рөлінде болып, Ашраф Хакимидің голымен есеп 3:0-ге жетті. Осылайша бірінші тайм нағыз шоуға айналып, ПСЖ қарсыласын есеңгіретіп тастады.
Бұл жеңіс париждіктер үшін маусымдағы үшінші ірі жетістік болды. Бұған дейін олар Франция чемпионатын және Суперкубокты ұтқан еді. Енді Франция Кубогын да иеленіп,"алтын требл" жасап отыр.
Алда ПСЖ үшін басты сынақ — 31 мамырда Мюнхенде өтетін Чемпиондар лигасының финалы күтіп тұр. Қарсылас Италияның алып клубы "Интер". Бұл ойын ПСЖ тарихындағы ең маңызды матчтардың бірі болмақ.
ПСЖ жеңіске үйренген. Бірақ бұл жолғы жеңіс шын мәнінде ерекше. Көпжылдық еңбек пен жаңа буынның таланты нәтижесін беруде. Егер алдағы финалда да сәттілік серік болса, ПСЖ тек Францияда емес, Еуропада да өз үстемдігін құрмақ.
