Кездесу Ресей мен Венгрияда өтпейді.
Украина Президенті Владимир Зеленский Ресей басшысы Владимир Путинмен Еуропаның бірқатар елінде кездесуге дайын екенін білдірді, деп хабарлайды inbusiness.kz сайты DW-ге сілтеме жасап.
Ол кездесуді Австрия, Швейцария немесе Түркия аумағында өткізуге келісіп отыр.
"Кездесудің бейтарап Еуропа елінде өткенін дұрыс деп есептейміз. Себебі Украинадағы соғыс Еуропа құрлығында жүріп жатыр. Біз Швейцария мен Австрияда кездесуге келісеміз дедім. Түркия ше? Түркия – НАТО мүшесі, Еуропаның бір бөлігі, біз оған да қарсы емеспіз", – деді Украина басшысы тілшілердің сауалына берген жауабында.
Зеленский "кездесу Мәскеуде өтпейтінін" кесіп айтты.
"Будапештті кездесу алаңы ретінде қарастыруға келсек, меніңше, қазір бұл оңай емес. Еуропа елдері соғыс кезінде Украинаға қолдау көрсетіп келеді. Шынын айту керек, Будапешттен ондай қолдау болмады. Мен Орбанның саясаты Украинаға қарсы деп айтып тұрғаным жоқ, бірақ та бұл саясат Украинаға көмек көрсетуге қарсы еді", – деді Украина президенті.
