Бүгін Қырғызстанда қазақ-қырғыз жастар форумының аясында ұлы ғалым, этнограф Шоқан Уәлихановтың өмірі мен еңбегіне арналған деректі фильмнің таныстырылымы өтті, деп хабарлайды Egemen.kz.
ҚР Мәдениет және ақпарат министрі Аида Балаеваның айтуынша, фильмде ұлы ғалымның қырғыз халқының тарихы мен этнографиясын зерттеуге қосқан үлесі мен «Манас» эпосын насихаттаудағы еңбегі кеңінен қамтылған.
«Әлемдік деңгейдегі рухани қазына саналатын «Манас» эпосын алғаш рет хатқа түсіріп, ғылыми ортаға ұсынған тұлға – Шоқан Уәлиханов еді. Сондай-ақ оның «Ыстықкөлге сапар күнделігі» қазақ пен қырғыз халықтарының ғылымдағы және руханияттағы бірлігінің айқын куәлігі», деп жазды министр.
Айта кетейік, форумға Қырғыз Республикасының Мемлекеттік хатшысы Марат Иманқұлов қатысып, шараның мәртебесін арттырды.
«Біздің елдердің жастары дәл осындай ұлы тұлғалардың мұрасынан шабыт алып, мемлекеттеріміз арасындағы ынтымақтастықты нығайта түсетіні қуантады», деді Аида Балаева.
