Бұл туралы Синьхуа агенттігі жазды .
1 қыркүйектен бастап Қытайда жеке зейнетақы шоттарынан қаражатты мерзімінен бұрын шешіп алуға мүмкіндік беретін жаңа ережелер енгізіледі, деп хабарлайды inbusiness.kz сайты.
Синьхуа агенттігінің хабарлауынша, Адам ресурстары және әлеуметтік қамсыздандыру министрлігі арнайы циркуляр жариялады. Құжатқа сәйкес, енді жеке зейнетақы жинақтарын бірқатар жағдайларда ерте шешіп алуға болады.
Мәселен, егер азаматтың өзі, жұбайы немесе кәмелетке толмаған балалары үшін соңғы бір жылда емделуге кеткен шығындар сол өңірдегі жан басына шаққандағы орташа табыстан асып кетсе, егер азамат соңғы екі жылда кем дегенде 12 ай бойы жұмыссыздық бойынша жәрдемақы алған болса немесе қазіргі уақытта ең төменгі әлеуметтік жәрдемақы алып отырса, онда зейнетақы жинағын мерзімінен бұрын ала алады.
Бұған дейін Аспан асты елінің тұрғындары зейнетақы жинақтарын тек заңмен белгіленген тәртіп бойынша ғана шешіп алатын. Атап айтқанда, зейнет жасына жеткенде, толық еңбекке жарамсыз болғанда немесе шетелге тұрақты тұруға кеткен жағдайда ғана алуға рұқсат етілген.
Қытайда жеке зейнетақы жинақтау жүйесі 2022 жылдың қарашасында бірнеше қалада пилоттық режимде іске қосылды. Кейін бұл жүйе бүкіл елде пайда болды.
