Еуропа көшбасшылары Ұлыбритания мен Францияның әскери күштерін Украина аумағында орналастыру мүмкіндігін талқылап жатыр, деп хабарлайды Bloomberg агенттігі.
19 тамыздағы келіссөздер әскер жіберудің егжей-тегжейіне, олардың саны мен дислокация орындарына арналды. Агенттіктің атап өтуінше, бұл қадам бейбіт реттеудің бір бөлігі болуы ықтимал.
Дереккөздерге сүйенсек, шамамен 10 ел Украинаға әскери контингент жіберуге дайын. Ақ үйдің баспасөз хатшысы Кэролайн Левитттің айтуынша, АҚШ әскерін Украинаға жіберу қарастырылып жатқан жоқ, бірақ Құрама Штаттар қауіпсіздік кепілдіктері аясында Украинаны әуеден қорғауды қамтамасыз ете алады.
Польша премьер-министрі Дональд Туск Канада, Жапония, Түркия, Жаңа Зеландия және Еуропа елдерінің көшбасшылары Украинаға қолдау көрсетуді жалғастыру қажеттігін растағанын мәлімдеді. Алдағы күндері НАТО қолбасшылары мен альянсқа мүше елдердің қорғаныс министрлері қауіпсіздік кепілдіктерін әзірлеу және тежеу күштерін орналастыру мәселелері бойынша кездесулер өткізеді.
Алғашқы кезеңде Украина әскеріне оқыту мен күшейту арқылы көмек көрсету жоспарланған. Франция мен Ұлыбритания жүздеген сарбазын жіберуге дайын, олар қақтығыс шебінен алыс жерде орналасады. Келесі кезеңде АҚШ барлау деректерімен бөлісіп, қару-жарақ жеткізуге, сондай-ақ әуе қорғанысына қолдау көрсетуге ықпал етуі мүмкін, деп хабарлайды Bloomberg.
