Түркістан облысында 2025 жылы ауыл шаруашылығы дақылдарының көлемі өткен жылмен салыстырғанда 34 мың гектарға ұлғайып, жалпы 907 мың гектарға егілді. Оның ішінде дәнді дақылдар 341 мың гектарға, майлы дақылдар 73 мың гектарға, көкөніс пен картоп 55,9 мың гектарға, бақша дақылдары 61,6 мың гектарға, ал мал азықтық дақылдар 229,9 мың гектарға орналастырылды. Мақта егісінің көлемі де айтарлықтай артып, өткен жылмен салыстырғанда 38 мың гектарға көбейіп, жалпы 145 мың гектарды құрады. Егіс көлемінің ұлғаюына жаңа су үнемдеу технологияларының енгізілуі әсер етті.
Бұл көрсеткіштер облыс әкімі Нұралхан Көшеровтің төрағалығымен өткен аппарат мәжілісінде талқыланды. Жиында аймақ басшысы жауапты тұлғаларға Мемлекет басшысының тапсырмаларын уақытылы орындауды қатаң тапсырды. Ол бекітілген жоспардың толық орындалуы керектігін атап өтіп, мемлекет тарапынан барлық қажетті қолдаулар көрсетіліп жатқанын айтты. Әкім субсидия алған шаруаларға тұрақты түрде мониторинг жүргізуді және 2025 жылға белгіленген индикаторлардың толық орындалуын қамтамасыз етуді міндеттеді.
Аппарат мәжілісінде облыстық ауыл шаруашылығы басқармасының басшысы Файзулла Байдуллаев сөз сөйлеп, саладағы негізгі жұмыстар жайлы баяндады. Оның айтуынша, көктемгі дала жұмыстарына жанар-жағармай бөлу, несие беру, минералды тыңайтқыштар мен тұқым тарату шаралары белгіленген мерзімде жүзеге асырылған. Жиын-терім жұмыстарына 38 мың тонна жанар-жағармай бөлініп, оны босату жұмыстары әлі де жалғасуда. Шаруалар биылғы жылы 1106 дана жаңа техника сатып алып, ауыл шаруашылығы техникасының паркі алты пайызға жаңартылды. Сонымен қатар облысқа тыңайтқыш өндірушілер мен сатушылар тарапынан 206 мың тонна минералды тыңайтқыш жеткізілген. Оның 101 мың тоннасына мемлекет тарапынан субсидия төленген.
Мемлекет басшысының ауыл шаруашылығы өнімінің жалпы көлемін екі есеге арттыру жөніндегі тапсырмасын орындау мақсатында облыста ауқымды жұмыстар жүргізілуде. Биылғы маусым айында басталған астық ору науқаны толығымен аяқталып, гектарына орта есеппен 12 центнерден өнім алынды. Нәтижесінде 337 мың тонна астық жиналды. Сонымен бірге облыс диқандары 9 мың тонна мақсары, 791 мың тонна көкөніс, 1,1 миллион тонна бақша өнімдері және 234 мың тонна картоп жинады. Мал азықтық дақылдар бойынша 5,2 миллион тонна өнім дайындау жоспарланып, қазіргі таңда 3,9 миллион тоннасы қамдалды.
Облыста су үнемдеу технологияларын енгізу де жүйелі түрде жүзеге асырылуда. Жоспар бойынша бұл әдіс 27 мың гектарға енгізілуі тиіс болса, қазіргі таңда 59 мың гектар жер су үнемдеу технологиясы арқылы игерілді.
Түркістан өңірінің климаты жылыжай шаруашылығын дамытуға қолайлы болып саналады. Бүгінде облыстағы жылыжайлардың жалпы көлемі 1715 гектарға жетіп, олардың алғашқы айналымынан 102 мың тонна көкөніс жиналды. Өткен жылы жылыжай шаруашылығын қолдауға 3,8 миллиард теңге бөлінсе, биыл бұл мақсатқа 4,4 миллиард теңге қаржы қарастырылған.
Сонымен қатар облыста қарқынды бау шаруашылығы дамып келеді. Биыл 181 гектарға жаңа бау салынып, жалпы көлемі 3,3 мың гектарға жетті. 2027 жылға дейін бұл көрсеткішті 8,2 мың гектарға жеткізу жоспарлануда.
Мал шаруашылығы да тұрақты даму үстінде. Бұл сала өңірдің ет экспортындағы әлеуетін едәуір арттырып отыр. Қазіргі таңда республика бойынша экспортқа шығарылатын ірі қара мал етінің 80 пайызы және қой етінің 75 пайызы Түркістан облысының үлесіне тиесілі. Биылғы жеті айдың ішінде экспортқа 20,8 мың тонна ірі қара мал еті және 13,4 мың тонна қой еті жөнелтілді.
Өңірде ет кластерін дамыту мақсатында жалпы құны 51,3 миллиард теңгені құрайтын жеті ірі инвестициялық жоба жүзеге асырылуда. Бұл жобалардың толық іске асуы жылына қосымша 35 мың тонна ет өндіруге мүмкіндік береді. Соның нәтижесінде ет экспорты екі есеге ұлғаяды. Бұдан бөлек, облыста биыл құны 134 миллиард теңгені құрайтын 29 жоба жүзеге асырылмақ. Бұл жобалар аясында 1456 жаңа жұмыс орны ашылады деп күтілуде. Қазіргі таңда құны 56,7 миллиард теңгені құрайтын 17 жоба іске асырылып, 626 жаңа жұмыс орны құрылды. Жыл соңына дейін жалпы құны 77,3 миллиард теңгеге тең 12 ірі инвестициялық жоба жүзеге асып, өңірдің агроөнеркәсіп кешені жаңа серпін алмақ.
