Алдағы 5-10 жылда қазір біз жаңа технологияға балап отырған құпиясөз, пин-код секілді атрибуттар да ескіруі мүмкін.
Оларды биометриялық сәйкестендіру құралдары толықтай алмастырады. Өйткені сенсорлық технологиялар мен жаһандану, соның ішінде жасанды интеллектінің кең қолданысқа енуі бұл үдерісті жеделдетіп жатыр.
Онлайн тауарлар биометрия бойынша сатылады
Ресейде онлайн-тауарлар биометрия бойынша саудаланбақ. Бет-әлпетті тану жүйесі күзден бастап іске қосылады. Осылайша солтүстіктегі көршіміз 18 жасқа толмаған балалардың энергетикалық сусын, пиротехника секілді қауіпті тауарларды сатып алуын шектемек. Алайда ірі маркетплейстердің бастамаға қатысты пікірі сан алуан. Олардың бірі бұл шараға күдікпен қараса, енді бірі жобаны жіті зерттеу қажет деп санайды.
ЦИТАТА:
Дмитрий Григоренко, РФ Үкіметі төрағасының орынбасары:
- 18+ санатындағы тауарларды сатып алу үшін жасты растау қажет болады. Бірақ үшінші тарапқа ешқандай дербес деректерді берудің қажеті жоқ. Онлайн сауда жасайтын адамның жасы мемлекеттік биометриялық жүйемен расталады.
Әуежайларда биометриялық бақылау жүйесі іске қосылады
Күзде Шенген аймағында биометриялық бақылау жүйесі іске қосылады. Яғни қазаннан бастап Еуропалық Одақ елдеріне бет алған жолаушы әуежайда саусақ іздері мен бет-келбеті бойынша деректерді тапсыруға міндетті. Бұл мәліметтер дерекқорда сақталады. Сондықтан екінші рет тек келгенде, тек бет-жүзін сканерлеу жеткілікті болады. 12 жасқа толмаған балалардан саусақ ізі талап етілмейді. Демек, енді құжат тексеру жеңілдейді. Сондай-ақ Шенген аймағындағы визасының мерзімі біткен азаматтарды анықтауға да сеп болады, дейді жоба авторлары.
Адамның кескіні жеке интеллектуалды меншік деп танылады
Дания дипфейк пен жасанды интелектінің зардабынан қорғайтын заң дайындап жатыр. Осы тұрғыда әр азаматтың бет-әлпетін, дауысын, тіпті мінез-құлық ерекшелігін жеке интеллектуалды меншік деп тану ұсынылды. Адамның виртуалды көшірмесін нейрожелінің көмегімен жасап, ғаламторда жарияласа, дипфейк авторы ол материалды өшіруі керек. Оған көнбегендерге қомақты айыппұл салынбақ. Ал зардап шегушіге өтемақы төлеуі қажет болады. Құжат қабылданса, Дания жасанды интеллектіні реттеу тетігін заңдық тұрғыда енгізген Еуропадағы алғашқы ел болмақ.
2024 жылы биометрия нарығы $42 млрд асты
Fortune Business Insights дерегі бойынша былтыр әлемдегі мобильді биометрия нарығы 42 млрд доллардан асты. Сарапшылар бұған COVID-19 пандемиясы оң әсер етті, дейді. Өйткені осы кезде жұрт жаппай онлайн-төлемдерге көшті. Киберқауіпсіздік саласындағы халықаралық Entrust компаниясының дерегі бойынша, әлемде 5 минут сайын адамның виртуал көшірмесін пайдаланып, алаяқтық жасалады екен. Сондықтан сарапшылар әлемде бұл технологияға сұраныс алдағы уақытта артпаса, кемімейді, деп отыр. Жалпы биометрия нарығының 40 пайызы АҚШ-қа тиесілі. Ізінше Еуропа тұр. Үштікті Азия-Тынық мұхиты аймағы сабақтайды. ТМД елдері биометриялық деректерді қолдануға күмәнмен қарайды. Сарапшылар бұған ақпараттың жеткіліксіздігі және мұны жеке өмірге қол сұғу ретінде қабылдауы себеп, дейді.
Қазір адамның виртуал көшірмесін жасау оңай. Алдыңызда сөйлеп тұрған сол адам ба, жоқ па? Тіпті соны айыра алмайтын жағдайға жеттік. Бірақ алаяқтар мұны арам пиғылын іске асыру үшін жиі пайдаланады. Дауысты да ұқсатып, бейнемен де шатастырып жатады. Мұндай қылмыстың алдын алуға биометриялық сәйкестендіру құралдары көмектеседі. Өйткені оны құпиясөз немесе құжат секілді қолдан жасау қиын.
