Қазақстан мен Қытай арасында жүк тасымалы артты, деп хабарлайды 24KZ. Әсіресе Шэньси провинциясынан жөнелтілетін жүк көлемі өскен. Бұған Сиань қаласындағы құрғақ порттың ашылуы тікелей әсер етіп отыр. Осының арқасында екі елдің сауда-саттығы ілгерілеп , трансшекаралық байланыс нығая түсті. Жалпы «Қазақстан – Сиань» терминалы іске қосылғалы 400 мың тоннадан астам жүк өңделіп, жөнелтілген.
Қытайдағы «Қазақстан – Сиань» терминалы іске қосылғалы екі еларасындағы сауда-логистикалық байланыс тиімділігі артты. Жүк көлемі бірден өсті. Өйткені кедендік рәсімдер жеделдеп, жеңілдей түсті. Ал шығын айтарлықтай азайды.
Мәселен, 2024 жылы Қазақстанның Сиань қаласындағы құрғақ портында 276 мың тонна көлемінде жүк өңделіп, жөнелтілген. Ал биылғы жылдың 4 айының өзінде бұл көрсеткіш 130 мың тоннаға жуықтады. Құрғақ порт аз ғана уақыт ішінде сауда-саттықтың артуына сеп болды. Оның үстіне Қазақстан теміржолы ұлттық компаниясы мен Сиань порты арасында терең байланыс орнады. Әріптестік аясында Сиань –Ташкент бағытындағы алғашқы жүрдек пойызы іске қосылды. Қазақстанның инфрақұрлымы мүмкіндіктерінің нәтижесінде екі шаһардың арасындағы жол 10-нан 6 күнге дейін қысқарды.
Мұхамеджан Сейтжанов, Қазақ-Қытай сауда-логистикалық терминалының бас директоры:
- Логистикалық инфрақұрылым мен трансшекаралық көліктік дәліздердің маңызы зор. Бұл екі ел арасындағы ынтымақтастық пен сауда қарым-қатынасының негізгі факторларының бірі. Оған дәлел: терминал ашылғалы жұмыс ыңғайлы әрі тиімді бола түсті. Осының арқасында жүк көлемі күннен күнге артып келеді. Қазір Алматы мен Транскаспий бағытына басымдық беріліп отыр. Сонымен қатар Қытай – Еуропа, Қытай – Орталық Азия бағыттарын да тұрақты түрде оңтайландыру жұмыстары жалғасады.
Қытайдан Еуропаға теміржол арқылы жіберілетін жүктің 80%-і Қазақстан арқылы жеткізіледі. Бұл еліміздің стратегиялық маңызды жол торабында тұрғанын айқындайды. Қазір мемлекет басшысының бастамасымен осы мүмкіндікті пайдалану бағытындағы инфрақұрылымдық жұмыстар қарқынды жүріп жатыр.
Теміржол тасымалы 2024 жылы алдыңғы жылмен салыстырғанда 13% артты. Жөнелтілген жүктің көлемі 32 млн тоннаға жетті. Биыл бұл көрсеткішті 40 миллион тоннаға жеткізу көзделіп отыр.
Авторлары: Руслан Бақытбекұлы, Мадияр Ерсайын
