Мұны Ресей президентінің көмекшісі Юрий Ушаков мәлімдеп отыр.
Оның сөзінше, қос президент арасындағы әңгіме шамамен 40 минутқа созылған, деп хабарлайды inbusiness.kz сайты.
– Бүгін, жарты сағат ғана бұрын АҚШ президентінің бастамасымен Владимир Путин мен Дональд Трамп арасында телефон арқылы әңгіме өтті, – деді Ушаков БАҚ өкілдеріне.
АҚШ басшысы Путинге Ақ үйде өткен келіссөздер қорытындысы туралы баяндаған. Сөз арасында Украина президенті Владимир Зеленскиймен және Еуропа елдерінің көшбасшыларымен жүргізілген кездесудің мән-жайымен бөліскен.
Юрий Ушаков келесі жайттарды атап өтті:
– Қос президент Украина мен Ресей делегациялары арасындағы тікелей келіссөздерді жалғастыруды қолдайтынын білдірді;
– Тараптар келіссөздерде Мәскеу мен Киевтің өкілдік деңгейін арттыру мүмкіндігін қарастыру идеясын талқылады;
– Екі елдің басшылары Украина мәселесі және өзге де тақырыптар бойынша байланысты үзбей жалғастыруға уағдаласты.
Сондай-ақ, Путин Аляскада өткен кездесу барысында көрсетілген қонақжайлық үшін Трампқа алғысын айтқан.
Еске салайық, Трамптың Зеленскиймен және еуропалық көшбасшылармен кездесуі дүйсенбіде Ақ үйде өтті.
Кездесуге НАТО Бас хатшысы Марк Рютте, Еуропа комиссиясының төрағасы Урсула фон дер Ляйен, Ұлыбритания премьер-министрі Кир Стармер, Франция президенті Эммануэль Макрон, Германия канцлері Фридрих Мерц, Финляндия президенті Александр Стубб, Италия премьері Джорджа Мелони және Украина президенті Владимир Зеленский қатысқан.
Трамп бұл келіссөздерді "өте нәтижелі" деп бағалап, Украинаға қауіпсіздік кепілдіктерін беру мәселесі талқыланғанын Путинге айтып берген.
