АҚШ президенті Дональд Трамп Украинадағы соғысты аяқтау мәселесіне арналған үшжақты кездесуді ұйымдастыруды жоспарлап отыр
Бұл туралы Caravan.kz медиа порталы Ulysmedia.kz-ке сілтеме жасап хабарлайды.
МӘН-ЖАЙ
Америкалық Axios басылымының екі дереккөзге сүйеніп жазуынша, Трамп “Ресей – АҚШ – Украина” форматындағы саммитті 22 тамызда өткізуді көздеп отыр.
– Екі дереккөздің айтуынша, Трамп Зеленскийге және телефон әңгімесіне қатысқан өзге тараптарға үшжақты саммитті тез арада, яғни 22 тамызда өткізгісі келетінін жеткізген, – деп жазды Axios.
Сонымен бірге Владимир Путиннің Украина президентімен кездесуге жария түрде уәде бермегені айтылды.
БҰҒАН ДЕЙІН
Еске салайық, бұған дейін Axios басылымы Трамппен келіссөздер барысында Путин қатаң бітім шарттарын қойғанын хабарлаған еді. Атап айтқанда, ол Украинаның Донецк пен Луганск облыстарынан әскерін толық әкетуін және Херсон мен Запорожье бағыттарында “ұрысты тоқтатуға” келісуін талап еткен.
15 тамыз күні Анкориджде (Аляска) Ресей президенті Владимир Путин мен АҚШ президенті Дональд Трамптың саммиті өтті. Шамамен үш сағатқа созылған келіссөздер ешқандай келісімге қол қойылмастан аяқталды, бірақ екі тарап бірқатар маңызды мәлімдемелер жасады. Қазіргі уақытта жаңа кездесуді, соның ішінде Мәскеуде өткізу мүмкіндігі талқыланып жатыр.
