Аляскадағы келіссөздерге қатысатын АҚШ делегациясының толық құрамы жария етілді. Владимир Путин мен Дональд Трамптың кездесуіне Құрама штаттар атынан 16 адам баратын болды, деп хабарлайды CNN арнасына сілтеме жасаған KAZ.NUR.KZ.
Ақ үйдің хабарлауынша, Аляскада өтетін маңызды келіссөздерге президентпен бірге 16 ресми тұлға қатысады. Олардың қатарында мемлекеттік хатшы Марко Рубио, қаржы министрі Скотт Бессент, сауда министрі Говард Лютник, ЦРУ директоры Джон Рэтклифф, Ақ үйдің баспасөз хатшысы Каролин Ливитт және АҚШ-тың ресми өкілі Стив Уиткофф.
Алайда CNN арнасының ақпаратына сәйкес, бұл ресми тұлғалардың қайссы Ресей өкілдерімен бір бөлмеде болатыны әзірге белгісіз.
"Экономикалық мәселелермен айналысатын шенеуніктердің қатысып жатқаны, келіссөздер соғыстан тыс тақырыптарды да қамтитынын болжауға мүмкіндік береді. Киев пен оның еуропалық одақтастарының ұсынысына қарамастан, саммитте Украинаның ресми тұлғалары болмайды", — деп хабарлайды телеарна.
Айта кетейік, Дональд Трамп пен Владимир Путиннің келіссөзі бүгін Аляскада өтеді.
Мәтіннен қате тапсаңыз, бізге жазыңыз
