Қазақстанның бірінші, әлемнің 12-ракеткасы Елена Рыбакина Францияның Страсбург WTA 500 турнирінде жеңімпаз атанды , деп жазады inbusiness.kz сайты.
Жарыстың 4-ракеткасы болып тіркелген Рыбакина финалда әлемнің 19-ракеткасы, ресейлік Людмила Самсоновамен кездесті.
Бірінші партияда есеп 2:1 болған мезетте қазақстандық теннисші брейк жасай білді. Содан кейін дес берген жоқ – 6:1. Екінші сетте Елена брейкпен алға шыққанымен, Самсонова сол бойда таразы басын теңестірді – 2:2. Тай-брейкте ресейлік спортшы сәтті ойнады – 7:6 (7:2).
Үшінші, шешуші сетті Рыбакина брейкпен бастады – 3:0. Тағы бір брейк – 5:1. Ақыры матчты кезекті эйспен түйіндеді – 6:1.
Екі сағат минутқа 33 минутқа созылған тартысты бәсеке барысында Елена 14 эйспен бірге 10 брейк-пойнттың алтауын пайдаланды. Самсонова 1 эйс, 2 брейктен (8 брейк-пойнт) аса алмады.
Осылайша, биылғы маусымда алғашқы титулына қол жеткізген Елена142 610 еуро табысқа қоса 500 рейтингілік ұпайға ие болды.
Рыбакина Страсбургте 2020 жылы финалда украиналық Элина Свитолинаға 4:6, 6:1, 2:6 есебімен есе жіберген еді. Содан соң Елена бұл қалада өнер көрсетпеген болатын.
Дүйсенбіде жаңартылатын WTA рейтингісінде Е.Рыбакина 11-інші, Л.Самсонова 18-орынға көтеріледі.
