Таразда былтыр қала құрамына кірген шағын аудан тұрғындары ауызсуға жарымай отыр.

Түркісіб елді мекенінде орталықтандырылған желі құрылысы 2021 жылы басталған. Бірақ жұрт әлі де тіршілік нәрін құдықтан тасып ішуге мәжбүр.

Түркісіб шағын ауданында ауызсу желісінің құрылысы 4 жыл бұрын басталған. Жоспар бойынша тұрғындарға 2022 жылы сапалы су берілуі тиіс еді. Дегенмен алғашында қарқынды басталған жұмыс, кейін бір жылға тоқтап қалды. Содан бері тұрғындар ауладан құдық қазып, кейбірі тасып ішуге мәжбүр.

Батырқазым Құлжанов, қала тұрғыны:

- Жерден қазылған құдықтан су ішіп жатырмыз. Оның анализін де телеарнадан көрсетіп жатыр. Әркімнің үйінен неше түрлі ауру шығып жатыр дейді. Енді біз де таза су ішкіміз келеді. Бала-шаға бар, немере-шөбере бар. Мейлі біздің геніміз үйреніп қалған шығар енді, бірақ балалардың барлығы нәзік. Барлығы көтере алмайды. Күнде ауру, жас балалар іштен ауырады.

Жауаптылардың мәліметінше құрылыстың кешігуіне мердігердің өзге қаладағы әкімдікпен соттасуы себеп. Сондықтан компания шоты бұғатталып, ақша аударымын жүзеге асыра алмаған. Тек бір жыл өткен соң құрылыс қайта жаңғыртылған. Содан жұмыстар былтыр аяқталған. Сол кезде Түркісіб шағын ауданының қала құрамына енуіне байланысты қазір жобаны қабылдау жұмыстары жүріп жатыр.

Елдос Кеңесбеков, Қалалық ТҮКШ бөлімінің сектор меңгерушісі:

- Қазіргі таңда Тараз қаласы әкімдігінің мемлекеттік меншікке қабылдап алу туралы қаулысы шығып отыр. Соған байланысты қазір Жамбыл-су пайдаланушы мекемесінің мамандарымен біз осы сумен жабдықтау жүйелерінің барлығын толығымен тексеріп зерделеп қазір қабылдау жұмыстарын жүргізіп жатырмыз.

Жамбыл-су мекемесінің мамандары 1000 тонналық резервуардағы су жарамсыз дейді. Себебі мұнарағы тіршілік нәрі 3-4 жыл бұрын толтырылған. Ұзақ уақыт тұрғандықтан иістеніп кеткен. Сондықтан жауаптылар екі апта бойы тазалық жұмыстарын жүргізбек.

Сейітжан Болатбеков, «Жамбыл-су» мекемесі ұңғымаларды пайдалану телімінің басшысы:

- Мекеменің лабароториясының сараптамасы бойынша химиялық және бактериалық анализден өтпеді. Судың ісі де бар. Балдыр басып кеткен. Қазіргі біздің жұмыс суды түсіріп резервуарларды жақсылап тазалап хлорлаймыз.

Жауаптылар ауызсуды жылыту маусымы басталғанша береміз деп мәлімдеді. Бірақ ол үшін тұрғындардың 60 проценті жаңа желіге қосылуы тиіс. Ал қазір 1000-ға жуық абоненттің тек 10 проценті үйлеріне су кіргізген.

Мерей Бает Бақытжан Бапаев Елдар Байділдә, 24КZ