12 тамыз – Халықаралық жастар күні. Осы мерекеге орай Түркістан облысы қоғамдық даму басқармасы «Жастар ресурстық орталығы» КММ ұйымдастырған «Жастармен Birge» атты ауқымды гала-концерт Түркістан қаласында өтті. Мерекелік кешке облыс әкімінің орынбасары Ертай Алтаев қатысып, өңірдің барлық жастарын атаулы күнмен құттықтады.
– Құрметті жастар! Сіздерді Халықаралық жастар күнімен шын жүректен құттықтаймын! Түркістан облысында 671 мыңнан астам жас тұрады, бұл – өңір халқының 30%-дан астамы. Демек, Түркістан – шынайы мағынасында жастардың өңірі. Бүгінде облыста жастарды жұмыспен қамту, кәсіпкерлікке баулу, сапалы білім беру және мәдени-спорттық әлеуетін арттыру бағытында ауқымды жобалар жүзеге асуда. Мәселен, 2025 жылы 22 мыңнан астам жас түрлі мемлекеттік бағдарламалар аясында қолдауға ие болды. Сонымен қатар 800-ге жуық жас «Серпін» бағдарламасымен солтүстік өңірлердің жоғары оқу орындары мен колледждерінде білім алуда. Түркістан жастары республика көлемінде ғана емес, халықаралық деңгейде де спортта, өнерде, ғылымда жетістіктерге жетіп жүр. Бұл – сіздердің еңбекқорлықтарыңыздың, білімге, жаңашылдыққа деген ұмтылыстарыңыздың жемісі, – деді Ертай Кенжебекұлы.
Кеш барысында белсенді жастарға алғыс хаттар табысталды. Сахнада жергілікті өнерпаздар мен қазақстандық эстрада жұлдыздары өнер көрсетіп, көрермендерге мерекелік көңіл-күй сыйлады. Бағдарламаға заманауи би, патриоттық әндер және жастар шығармашылығының түрлі жанрлары енгізілді.
Анықтама:
Халықаралық жастар күні – Біріккен Ұлттар Ұйымының Бас Ассамблеясы 1999 жылы бекіткен мереке. Ол жастардың қоғам өміріне белсенді араласуын, көшбасшылық қасиеттерін және шығармашылық әлеуетін дамытуға қолдау көрсетуді мақсат етеді.
Түркістан облысындағы жастар саясатының ахуалы:
Түркістан өңірінде жастарға арналған 16 аудандық және қалалық жастар ресурстық орталықтары жұмыс істейді. Олар жыл сайын 500-ден астам іс-шара өткізіп, 100 мыңға жуық жасқа түрлі бағытта қолдау көрсетеді. Жастар кәсіпкерлігін дамыту мақсатында гранттар мен жеңілдетілген несиелер беріледі. Спорт инфрақұрылымы мен мәдени орталықтардың көбеюі де жастардың бос уақытын тиімді өткізуіне жағдай жасауда. Соңғы жылдары аймақта халықаралық деңгейдегі спортшылар, өнерпаздар мен жас ғалымдар саны артып келеді.
Түркістандағы «Жастармен Birge» гала-концерті – жастарды қолдауға, олардың әлеуетін ашуға және қоғамдағы белсенділігін арттыруға бағытталған игі бастамалардың бірі болды.
qazaquni.kz
