13 тамызда полицияға Өтеген батыр ауылындағы көппәтерлі үйде өрт шыққаны жөнінде хабарлама түскен.
Оқиға орнына жедел түрде полиция бөлімінің бастығы Б.Даркенбаев және полиция қызметкерлері Ж.Саудақас пен А.Аметов келіп бірден көмектесуге кіріскен, деп жазады inbusiness.kz сайты.
Тәртіп сақшылары үйге кірген сәтті бөлмелерді қою түтін басқанын анықтайды. Олар кішкентай үш баласы бар әйелді байқап, олардың өміріне төнген қауіптің аса жоғары екенін түсінді. Бір сәт кідірместен көмекке ұмтылған.
– Мұндай жағдайда ең бастысы – жедел әрі үйлесімді әрекет ету. Себебі есеп секундтармен жүреді, – деді Б.Даркенбаев.
Өрт сөндірушілермен бірлесе жұмыс істеген тәртіп сақшылары арнайы техника баспалдағы арқылы отбасын қауіпсіз жерге шығарып, көшеде медицина қызметкерлері алғашқы көмек көрсетті.
Үйді қосымша тексеру кезінде полицейлер газ баллонын тауып, оны жарылыс пен ауыр зардаптардың алдын алу үшін дереу қауіпсіз жерге шығарып үлгереді.
– Азаматтардың өмірі мен қауіпсіздігі – біздің басты міндетіміз. Біз әрқашан, тіпті өз өмірімізге қауіп төнсе де, көмек көрсетуге дайынбыз, – деп атап өтті құтқаруға қатысқан полицейлер.
Полиция қызметкерлерінің жедел әрі кәсіби әрекетінің арқасында әйел мен оның үш баласының өмірі аман қалып, ауқымды қираудың алды алынды.
Алматы облысы полиция департаменті бұл жағдайды құқық қорғау органдары қызметкерлерінің жанқиярлығы мен жоғары кәсібилігінің жарқын үлгісі ретінде бағалады.
