Бүгін "Астана" Конференция лигасының үшінші іріктеу кезеңі аясында өз алаңында Швейцарияның "Лозанна" клубын қабылдайды. Матч Қазақстан уақыты бойынша 19:00-де басталады.
Швейцариядағы матч алаң иелерінің 3:1 есебімен аяқталып, қазақстандықтардың еурокубоктың келесі кезеңіне шығу жоспарына едәуір соққы болды. Бұл ойында "Астана" өзіне мүлдем ұқсамады. "Лозаннаның" жекелеген ойыншыларының шеберлігі жоғары болғанымен, аса қауіпті қарсылас емес. Оған қоса "астаналықтар" бұған дейін де әлдеқайда мықты клубтарды жолдан тайдырған.
Бірінші кезекте сұрақ тудырған Григорий Бабаян таңдаған алғашқы құрамы. Бастапқы минуттарда негізгі көшбасшылар — Марин Томасов пен Назми Грипши алаңға шықпады. Маусымда тұрақты түрде гол соғып, шабуылға серпін беріп жүрген қос ойыншының орны бөлек. Олардың орнын оң қанатта Макс Эбонг, ал орталықта негізінен тірек жартылай қорғаушы саналатын Иван Башич басты. Алекса Аманович пен Бранимир Калайца алаңға шығып, Екеуі де негізінен орталық қорғаушылар. Қақпада Мухаммеджан Сейсен ойнады. Ал еурокубоктарда бұған дейін қақпаны тек Йосип Чондрич қорғап келген.
"Лозаннаға" қарсы кездесудің алдында "Астана" ҚПЛ аясындағы матчын өткізбеді. "Зимбрумен" өткен матчтан соң Қазақстанға оралмай, бірнеше күн Молдовада жаттығып, кейін бірден Швейцарияға жол тартты. Бәлкім, алғашқы ойында Бабаян өз алаңында сенімді ойнайтын қарсыластың шабуылын тоқтатуға бағытталған қорғанысы мығым құрам шығарғысы келген болар. Алайда жоспар Кипрас Казуколовас пен Александр Марочкиннің қателіктерінен тас-талқан болды. Шабуылда да айтарлықтай белсенділік байқалмады. Дегенмен, алаңнан қуылуға шақ қалған Иван Башич соңғы минуттарда әдемі гол соғып, жанкүйерлерге үміт отын сыйлады.
Бүгін Астанада шешуші ойын. Мұнда біз басқа құрамды, яғни қорғанысқа көңіл бөліп, алғы шепте негізгі жұлдыздары бар "Астананы" көреміз деп үміттенеміз. Командаға енді артқа шегінуге жол жоқ. Алғашқы минуттардан-ақ алға ұмтылып, гол соғуға бар мүмкіндікті пайдалану қажет.
Ең бастысы "Астана" "Тобылға" қарсы ойынды кейінге қалдырды. Бұл дайындыққа бір апта уақыт берді. Ал "Лозанна" демалыссыз, "Цюрихке" қарсы қиын матч өткізді. Швейцариялықтар сырт алаңда жиі қателеседі. Өткен раундта "Вардарға" ұтылып, ішкі біріншілікте таяуда ғана жоғары лигаға оралған "Тунға" жол берді.
Өз алаңында "Астана" мүлде басқа деңгейде ойнайды. Бүгін елордалықтарға кем дегенде екі гол салып, тым болмағанда ойынды қосымша уақытқа немесе пенальтиге дейін жалғау қажет. Себебі тәжірибесі мол "Астана" келесі кезеңге өтуге әбден лайық. Ал бірден негізгі уақытта жеңіске жетіп, келесі кезеңге өтіп жатса, тіпті тамаша болар еді.
