Біргеміз қоры инстаграмм парақшасында бұл оқиғаға қатысты түсінік берді.
Дженнифер Лопестің Алматыда өткен концертіне көмектескен еріктілер шағымын енді прокурорлар тексеретін болады, деп хабарлады 31 арнаның Информбюро ақпараттық бағдарламасы.
Айта кетейік, волонтёрлар ауқымды шарада "жастарға жағдай жасалмады" деп желіде жазба жариялаған еді. Ал Біргеміз қоры инстаграмм парақшасында бұл оқиғаға қатысты түсінік берді.
"Ұйымдастырушылар ақпаратты шындыққа жанаспайды деп отыр. Әрі концерт болған күні барлық волонтёр ыстық тамақпен, сусынмен қамтылды. Яғни, еріктілердің жұмыс істеу кестесіне сәйкес уақытымен берілген", – дейді.
Тіпті, стадион аумағында демалатын және жеке заттарды сақтауға арналған орын, ауыз су сияқты қажеттіліктердің бәрі қарастырылыпты.
"Ұйымдастырушылар еріктілермен үнемі байланыста болды. Барлық қатысушыға жұмыс істеу кестесін таңдау еркіндігі берілді. Концерттен кейін стадион аумағын жинау да міндетті жұмыс болған жоқ. Сондықтан, желіде тараған кейбір ақпараттар шындыққа жанаспайды. Концерт болған күні барлық волонтёр тамақпен, сусындармен қамтылды", – делінген "Біргеміз Алматы" қоғамдық қорының парақшасында.
