Әлеуметтік желіде Ақтау маңындағы былтыр қайғылы әуе апаты болған жерге орындықтар қойылып, гүлдер егілген қоршау орнатылғаны көрінетін видео тарады, деп жазады inbusiness.kz сайты.
Видеоны таратқан автордың айтуынша, орындықтар мен қоршау адамдар келіп, отырып, қаза тапқандарды еске алуы үшін жасалған. Ол бұл бастаманы дұрыс әрі адамгершілікке сай деп бағалап, қолдау білдірді.
Түпқараған ауданы әкімдігі кішкентай мемориалдық алаңды жасауды өңірдің белсенді тұрғындары ұйымдастырғанын растады. Барлығы олардың жеке бастамасымен, қайғылы оқиғада қаза тапқандардың рухына тағзым ретінде жасалған.
Қайғылы оқиға былтыр 25 желтоқсанда болды. Ұшақ бортында бес экипаж мүшесін қосқанда барлығы 67 адам болған. ҚР ТЖМ алты қаза тапқан қазақстандықтың тізімін жариялады, олардың үшеуі біздің өңірдің тұрғындары болған. Премьер-министрдің орынбасары Қанат Бозымбаев брифинг өткізіп, апат салдарынан барлығы 38 адамның қаза тапқанын, 29 адамның аман қалғанын мәлімдеді.
