28 жастағы спортшы алдағы маусымда елорданың «Астана» волейбол клубының намысын қорғайды. Сабина былтырғы маусым алдындағы дайындық кезеңінде де «Астанамен» бірге жаттығып, кейін Индонезия чемпионатына ойнауға кеткен, деп жазады Skifnews.kz ақпарат порталы 1bol.kz-ке сілтеме жасап.
Ол бұған дейін бірнеше жыл бойы БАӘ-нің «Әл-Васл» клубында өнер көрсетіп, Араб лигасының чемпионы атанды. Ал өткен маусымда Индонезия біріншілігінде бақ сынап, халықаралық тәжірибесін толықтырды.
Спортшы бұған дейін қазақстандық БАҚ-қа ренжіген еді. Өйткені, отандық ақпарат көздері ол ойнайтын команданың жеңілгенін жарыса жазған.
«Басқа елдердің БАҚ өкілдері тек жақсы нәрсе жазады. Сүрінгеніңді емес, биікке өрлегенінді байқайды. Ал қазақстандық БАҚ тек негатив жазудан қолы босамайды. Комментарий оқысаң, бізге алыстан жау керек жоқ деп ойлайсың. Өз-өздеріңді құртасыңдар. Сондықтан талантты жастардың бәрі шетелге кетіп жатыр. Елде оларды қолдамайды және бағаламайды», — дейді Сабина Алтынбекова.
Оның айтуынша, керсінше шетелде қолдау көп.
«Басқа ел, басқа адамдар, бірақ олардың қолдауы қазақтарға қарағанда көбірек. Рахмет, Индонезия! Мен сіздерді жақсы көремін», — дейді спортшы.
