Алматыда халықтың осал тобына жататын тұрғындарға 1,5 млн теңге көлемінде грант беріледі, деп хабарлайды 24kz.
Мұндай қолдау биыл екінші рет жасалғалы тұр. Бұл қаражатты мүгедектігі бар адамдар, мүмкіндігі шектеулі жанды бағып отырғандар, асыраушысынан айырылғандар, қоныс аударып келген көпбалалы аналар мен аз қамтылған отбасылар алады. Өтініш Enbek.kz порталы арқылы 22 тамызға дейін қабылданады. Одан кейін бағдарламаға қатысушылар 14 күн кәсіпкерлік негіздерін оқып, бизнес-жоба әзірлейді. Грант алғаннан кейін олар әр тоқсан сайын есеп беріп отырады. Қаржының мақсатты жұмсалуы бақыланып, мониторинг жүргізіледі. Бұл туралы өңірлік коммуникациялар қызметінде өткен брифингте айтылды. Қазір Алматыдағы мүгедектігі бар адам саны 60 мыңға жуық. Олардың жартысы еңбекке жарамды. Бірақ барлығы бірдей жұмыспен қамтылмаған.
Әділет Жаңабаев, «Еңбек мобильділігі орталығы» КММ директоры:
- 264 грант бөлінеді. Осы екінші лекте. Бірінші лек бойынша маусым айында өткізілді. Ол лек бойынша 169 адам бизнес-жобаларын қорғап, 531 адам қатысты. Сол кезде өзіміз көздегендей 169 адам грант ұтып алды. Соның қорытындысы бойынша басым бөлігі шеберхана, тігінші бизнесі, техникалық жөндеу орталықтары бар. Одан кейін балаларға дамыту орталықтарын ашып жатыр.
