Қорғаныс министрлігінің хабарлауынша, 12 тамызда су асты іздестіру жұмыстары барысында экипаждың үшінші мүшесінің денесі табылған, деп жазады Egemen.kz.
10 тамызда экипаж командирі майор Нұржігіт Қайратұлы Үйсінбаевтың денесі табылған болатын.
Ол эскадрилья командирінің (армиялық авиация) тәрбие және идеологиялық жұмыс жөніндегі орынбасары болған. 1-сыныпты ұшқыштың EC-145 тікұшағын басқаруда тәжірибесі жоғары, жалпы ұшу уақыты – 930 сағат болған.
11 тамыз күні іздеу топтары авиациялық эскадрилья авиациялық буынының борт технигі капитан Бақтияр Сәниоллаұлы Ержігітовтің денесін тапқан еді. 1-сыныпты маманның EC-145 тікұшағын басқаруда тәжірибесі жеткілікті, жалпы ұшу уақыты – 300 сағатты құраған. Авиациялық бөлімдерде көп жылдық тәжірибе жинақтаған жоғары білікті маман, бейіндік дайындықтан өткен.
12 тамыз күні экипаж командирінің көмекшісі капитан Аман Нұрланұлы Амангелдінің денесі табылды. Тәжірибелі ұшқыш, күрделі метеорологиялық жағдайларда бірнеше мәрте ұшып, жаттыққан. EC-145 тікұшағындағы ұшу уақыты – 295 сағат.
Қаза тапқан ұшқыштардың үшеуі де Әуе қорғанысы күштері әскери институтының түлегі.
Министрлік акваторияны және оған іргелес аумақты зерттеу бойынша іздестіру шаралары жалғаса беретінін мәлімдеді.
Осыған сәйкес тікұшақ бөліктерін анықтау және жағаға шығару жұмыстары жалғасын табады.
Апаттың себептерін анықтау үшін тергеу амалдары жүргізіліп жатыр.
Қазақстан Республикасының Қорғаныс министрлігі мен Қарулы күштерінің басшылығы қаза тапқандардың туыстары мен жақындарына қайғырып көңіл білдіріп, оларға барлық қажетті көмек көрсетілетінін айтты.
Айта кетейік, 2025 жылғы 25 шілдеде Алматы облысында жоспарлы ұшу кезінде Қазақстан Республикасы Қарулы Күштерінің Әуе қорғанысы күштеріне тиесілі EC-145 тікұшағы радардан жоғалып кеткен болатын.
