Бұл туралы бүгін Үкімет отырысында Оқу-ағарту министрі Ғани Бейсембаев баяндады, деп жазады Egemen.kz.
Бүгінде елімізде 8 мыңнан астам мектеп жұмыс істейді. 1 қыркүйекте 4,1 млн оқушы, оның ішінде 341 мың бүлдіршін бірінші сыныпқа барады. 232 мың оқушы 11-сыныпқа аяқ басады.
Министр жаңа оқу жылының жаңалығы ретінде білім беру үдерісіне ЖИ элементтері кезең-кезеңімен енгізілетінін айтты.
2025-2026 оқу жылында ЖИ интеграциясы «Цифрлық сауаттылық» және «Информатика» пәндерінен басталады. Бұл бағытта орта білім беру жүйесінде жасанды интеллектті қолданудың этикалық стандарттары бекітілген. Оқушылар үшін Day of AI онлайн курстары, ал педагогтер үшін үш деңгейлі біліктілікті арттыру курстары әзірленген.
«Мемлекет басшысының тапсырмасы бойынша басқарудың жаңа стандарты әзірленіп, 3 мыңнан астам педагогтер үш деңгейлі оқытудан өтті. Аталған модель өз жұмысын осы жылдың қыркүйек айынан бастайды», деді Ғани Бейсембаев.
Ғани Бейсембаев «Келешек мектептері», жаңа форматтағы мектептерді басқару мәселесін де қозғады.
