Ұлыбританияның Қазақстанға құйған инвестиция көлемі биыл бірінші тоқсанда 45%-ке өсті. Бұл туралы Қазақ-британ қауымдастығының Лондонда өткен бизнес-кездесуінде айтылды, деп хабарлайды 24kz.
Жиынға қатысқан әлеуетті инвесторлар ел экономикасына қаржы құю мен серіктестікті кеңейтудің жолдарын талқылады.
Ғалымжан Қараманұлы, тілші:
- Лондондағы бизнес-кездесуге қатысушылардың қарасы көп. Бұл – екіжақты ынтымақтастықтың қазіргі деңгейін ғана емес, экономикалық байланыстардың жыл сайын кеңейіп жатқанын көрсетеді. Ұлыбритания – Қазақстандағы 6 ірі инвестордың бірі. Арадағы жылдық тауар айналымы 3 млрд фунтқа жетеді. Бұл көрсеткіш 1991 жылы Қазақстан тәуелсіздік алғалы бері қалыптасқан стратегиялық әріптестіктің жемісі.
Ерлан Зейнешев, Қазақстанның Ұлыбританиядағы Елшілігінің экономика бөлімінің жетекшісі:
- Ұлыбритания мен Қазақстанның сауда-экономикалық және инвестициялық ынтымақтастығы қарқынды дамып келе жатыр. Биылғы жылдың алғашқы тоқсанында Ұлыбританияның Қазақстанға инвестиция көлемі 45%-ке өсті. Бұл – өте жақсы нәтиже.
Инвестициялар еліміздегі тау-кен өнеркәсібіне ғана емес, энергетика, білім беру, цифрландыру салаларына да салынып жатыр. Биыл Астанада әлемдік озық оқу орындарының бірі Кардиф университетінің кампусы ашылады. Алматыда ірі фармацевтикалық компания өндіріс ошағын салғалы отыр. Ауыл-шаруашылығы және су менеджементі салалары бойынша келіссөздер жүріп жатыр.
Джон Морроу, Британ-қазақ қауымдастығының мүшесі:
- Бүгінгі басқосуда Қазақстандағы инвестициялық мүмкіндіктер кеңінен талқыланды. Қатысушылар елде инвесторларды тарту үшін қандай шаралар қолға алынып жатыр, екіжақты әріптестікті қалай тиімді дамытуға болады деген сияқты мәселелерге баса назар аударды.
Бизнес қауымдастықты, әсіресе, жаңартылатын энергетика және Қытайды Еуропамен байланыстыратын орта дәліз жобалары қызықтырды. Әлемдік деңгейдегі инфрақұрылымы бар «Астана» халықаралық қаржы орталығы туралы сұрақтар қойылды. Әлеуетті инвесторлар елімізбен етене таныс сарапшыларды тыңдап, пікірталастарға белсенді араласты.
Нассер Салем, заңгер:
- «Астана» халықаралық қаржы орталығының соты мен Халықаралық төрелік орталығы 7 жылдың ішінде шетелдік бизнес қауымдастықтың елге деген сенімін нығайтты. Мен араб инвесторларының өкілі ретінде оларға Қазақстанды жаңа нарық ретінде ұсынғым келеді.
Қазақстан – Орталық Азиядағы саяси және экономикалық жағынан тұрақты әрі қарқынды дамып келе жатқан мемлекет. Қатысушылар да жоғары білікті жұмыс күші бар, қолжетімді электр энергиясын ұсына алатын және жаһандық транзиттік әлеуеті зор елмен жұмыс істеуге келісіп тарқасты.
Авторы: Ғалымжан Қараманұлы
