Қайғылы жағдайдың көпшілігі тыйым салынған орындарда болған.
Құтқарушылардың мәліметтеріне қарағанда, өңірде қауіпсіз демалыс үшін 25 жағажай ұйымдастырылған. Ал суға түсуге тыйым салынған орындар саны – 74, деп хабарлайды inbusiness.kz сайты.
"Адамдардың суға батуының басты себебі қарапайым қауіпсіздік ережелерін сақтамау, өз күшін асыра бағалау болып табылады. Адамдар ескертулерді елемей, өмірлері мен денсаулықтарын қатерге тіге отырып, судың қауіпті бөліктеріне барады", – деді Исхар Савазов.
Оның сөзінше, өмірлерін қауіпке тіккеннен бөлек адамдарға әкімшілік айыппұл салынуы мүмкін. Биыл жаз маусымы басталғалы 32 адамға айыппұл салынды.
Қайғылы жағдайлардың алдын алу үшін ШҚО Төтенше жағдайлар департаментінің өкілдері еріктілермен және жергілікті атқарушы органдармен бірлесіп, тұрақты рейдтер ұйымдастырып тұрады. Жаз басталғалы олар 1 320-дан астам түсіндіру жұмыстарын жүргізген.
