Бұл туралы Еңбек және халықты әлеуметтік қорғау министрлігі мәлім етті.
1 тамыздағы жағдай бойынша мемлекеттік еңбек инспекторлары елімізде 239 кәсіпорында 3,5 мыңнан астам жұмыскерге 1,3 млрд теңге жалақы қарызы барын анықтады, деп хабарлайды inbusiness.kz сайты.
Түрлі ұйымдарда жүргізілген тексерулер барысында еңбек құқығының 4 мыңнан астам бұзылу фактісі тіркелді. Жалақы қарызы мен еңбек құқығының бұзылуы анықталған кәсіпорындардың басшыларына 2 287 ұйғарым беріліп, 277 млн теңгеден астам айыппұл салынды.
Қабылданған шаралардың, оның ішінде жалақы бойынша берешекті өтеудің қатаң кестелері мен мерзімдерін белгілеудің нәтижесінде 3,4 мыңнан астам жұмыскердің құқығы қорғалып, оларға 1,1 млрд теңге төленді.
Министрліктің дерегінше, еңбек заңнамасының сақталуына мемлекеттік бақылау ерекше назарда. Биыл 1 тамыздағы жағдай бойынша мемлекеттік еңбек инспекторлары 3 514 тексеру жүргізіп, 4 132 бұзушылықты анықтады. Оның ішінде еңбек саласында – 3 465, еңбек қауіпсіздігі және еңбекті қорғау бойынша – 648, халықты жұмыспен қамту бойынша – 19 дерек тіркелген.
"Жалпы қабылданған шаралардың нәтижесінде 25 мың жұмыскердің еңбек құқығы қорғалды", – деп жазды ведомстводан.
