Тексеру барысында Ғ.Мүсірепов, Қызылжар, Тимирязев, Уәлиханов аудандары мен Петропавл қаласындағы 74 мектепте "Білім туралы" заңның 43-бабының талаптары өрескел бұзылғаны белгілі болды .

Солтүстік Қазақстан облысының прокуратурасы кәмелетке толмағандардың құқықтары мен мүдделерін қорғау бағытындағы жұмысын жалғастыруда, деп жазады inbusiness.kz сайты.

Оқу орындарының интернет желісінде суицидке, зорлық-зомбылыққа және балалардың өмірі мен денсаулығына қауіп төндіретін өзге де әрекеттерге итермелейтін материалдары бар тыйым салынған сайттарға еркін кіру мүмкіндігі болған.

Прокуратура қаулысымен білім беру мекемелерінің басшылары Әкімшілік құқық бұзушылық туралы кодекстің 409-бабы 7-2-бөлігі бойынша айыппұлмен жазаланды. Сонымен қатар, прокурорлардың ұсынысымен барлық мектептерде тыйым салынған ресурстарға қолжетімділік шектелді.

Бұл шаралар 11 мыңнан астам баланың құқықтарын қорғауға мүмкіндік берді.

Облыс прокуратурасы еске салады: балалардың құқықтары бұзылған жағдайда заңды өкілдер немесе балалардың өздері 8 (7152) 36-03-59 сенім телефонына хабарласа алады.