10 тамызда туыстары 33 жастағы майор Нұржігіт Үйсінбаевты соңғы сапарға шығарып салды. Бала күнінен әскери ұшқыш болуды армандаған ол бүкіл ғұмырын авиацияға арнады. Анасының айтуынша, техникаға ерекше құмар болып, күндіз-түні әуеде қалықтап, мыңдаған сағат ұшу тәжірибесін жинаған, деп хабарлайды Skifnews.kz ақпарат порталы.
Түркістан облысы, Төлеби ауданы, Ленгір қаласында туған Нұржігіт – отбасындағы екі ұлдың үлкені. 2008 жылы армандаған мамандығына түсуге дайындалғанымен, тек 2010 жылы Ақтөбедегі «Әуе қорғанысы» училищесіне қабылданды. 2014 жылы лейтенант шенін алып, соңғы 11 жылын тікұшақ басқаруға арнады.
"Жастайынан әскери болуды армандады ғой. Кішкентайынан тәртіпке бағынып, бізді де тәртіппен жүргізетін. Аспанда қалықтап жүруді бала кезінен армандады. Бүкіл өмірін осы әскери авиацияға арнады ғой. Күндіз-түні ұшты. Мыңдаған сағаттар жинады. Санатын да көтерді. Бүкіл оқуын оқыды. Қандай жаңа шыққан оқу болса біреуінен қалмады ғой. Қатарының алды болды. Өзінің техникасын жан-тәнімен жақсы көретін еді гой. Мамам мен аспанда ұшсам, құстай қалықтаймын дейтін", – деп еске алды ұлын кара жамылған ана.
Інісі Ержігіт Медетов ағасын еңбекқор, турашыл, отбасының қорғаны болғанын еске алды. «Тікұшақты жанындай жақсы көретін. Сол тікұшақпен мәңгілікке кетті. 15 күн іздестіргеннен кейін ғана табылды», – деді ол.
Екі апта бұрын Алматы облысы, Сорбулақ маңында жоғалған тікұшақтың бөлшектері табылған еді. Кеше іздеу тобы судың астынан командирдің денесін шығарып, туыстарына тапсырды.
Марқұм туған жерінде жерленді. Отбасы іздеу жұмыстарына атсалысқан барлық мамандарға алғысын білдіріп, істің мән-жайы тергеу кезінде анықталатынын жеткізді.
