Украина президенті Владимир Зеленский Мемлекет басшысы Қасым-Жомарт Тоқаевпен телефон арқылы не туралы сөйлескенін айтты, — деп хабарлайды Massaget.kz тілшісі.
Бұл туралы ол Х әлеуметтік желісіндегі парақшасында жазды.
"Қазақстан Президентімен жақсы әрі мазмұнды әңгіме болды. Украин халқын, біздің тәуелсіздігімізді, егемендігіміз бен аумақ тұтастығымызды қолдағаны үшін алғыс айтамын. Біз мұны жоғары бағалаймыз. Шынында да, халықаралық құқық, БҰҰ Жарғысының негізгі қағидаттары және ақылға қонымды әрекет ету, яғни мемлекеттердің шекаралары мен аумақ тұтастығына, сондай-ақ әрбір халықтың абыройына құрмет үстем болуға тиіс", – деп жазды Зеленский.
Зеленский кез келген ұлт үшін тәуелсіз мемлекетті жай ғана "аумақ" ретінде қарастыру және оны бөлуге ұмтылу аса қауіпті екенін атап өтті.
"Тарих бірнеше рет дәлелдеді: егер бір мемлекетке қатысты осындай әділетсіздікке жол берілсе, бұл аяқталмайды. Сондықтан барлық мемлекет Украина үшін әділ әрі берік бейбітшілікке қол жеткізуі маңызды, ол украин халқының егемен құқығын құрметтеуге негізделуі керек. Мен Президент Тоқаевқа Президент Трамппен және еуропалық серіктестермен жүргізіліп жатқан дипломатиялық жұмыстар, келісімдер туралы ақпарат бердім. Кеше қауіпсіздік мәселелері бойынша кеңесшілердің кездесуі өтті, және Еуропаның ортақ ұстанымы бар: соғыс мүмкіндігінше тезірек, сенімді бейбітшілік негізінде аяқталуға тиіс", – деді ол.
Сондай-ақ, ол "өкінішке қарай, Ресей соғысты созу үшін барын салып отыр, белгіленген мерзімге қарамастан кісі өлтіруді тоқталмай және болашақтағы соққылар үшін тиімдірек позицияны иеленуге тырысады" деп қосты.
"Украина шынайы бейбітшілік үшін барлық серіктеспен барынша тиімді жұмыс істеуге дайын. Украинаға қатысты мәселелер Украина қатысуымен шешілуі керек. Барлық серіктес мұны түсінеді. Біз байланыста болып, елдеріміз бен халықтарымыз арасындағы қарым-қатынасты жақсарту бағытында жұмыс істеуге келістік", – деп түйіндеді Зеленский.
Instagram парақшамызға жазылып, ең қызықты ақпараттарды бірінші болып оқыңыз!
