Бүгін Елена Рыбакина АҚШ-та өтетін турнирге қатысады.
Қазақстанның бірінші ракеткасы Елена Рыбакина Канаданың Монреаль қаласында өткен WTA 1000 санатындағы турнирден кейін әлемдік рейтингтегі ТОП-10 қатарына қайта оралды. Live-рейтингте қазақстандық теннисші бірден екі сатыға көтеріліп, 12-орыннан 10-орынға шықты.
Бүгін, 9 тамыздан 10 тамызға қараған түні Елена Рыбакина АҚШ-та өтетін WTA 1000 сериясындағы Цинциннати турнирінде алғашқы матчын өткізеді. Рыбакинаның қарсыласы мексикалық Рената Сарасуа (68-орын). Олар екінші айналымда кездеседі. Бұл матчтың тікелей трансляциясы Қазақстан уақытымен сағат 23:30-да басталады.
Естеріңізге сала кетейік, Цинциннати турниріне дейін Рыбакина Канадада өткен Монреаль жарысына қатысып, жартылай финалға дейін жетті. Сол жерде ол болашақ чемпион, канадалық Виктория Мбокодан 6:1, 5:7, 6:7 есебімен ұтылды. Рената Сарасуа да Монреаль турнирінде бақ сынап, сәтсіз өнер көрсетті. Ол екінші айналымда латвиялық Елена Остапенкоға 2:6, 6:4, 2:6 есебімен жол берді.
Биыл Цинциннати қаласында өтетін WTA турнирінің жүлде қоры 5 152 599 долларды құрайды. Жеңімпаз 752 275 доллар және 1000 рейтингтік ұпайға ие болады.
