«Адамзаттың Абайы» Семейде ақын мерейтойы аясында осындай атпен айтыс аламаны өтті. Талай додада топ жарған кілең мықтылар хакім тойында сахнаға шығып, жыр сүйер қауымды өнерімен тамсандырды. Жұрттың делебесін қоздырып, рухын көтерді. Ұлы ақын атын асқақтатты. Шабыттың тұлпарына мінгендерден кім үздік атанды.
Ұлы ойшылдың мерейтойындағы айтыс додасын абай жұртшылығы асыға күткені көрініп-ақ тұр. Ақын атымен аталатын театрда ине шаншар орын жоқ. Сондықтан көпшілік доданы даладағы экраннан тамашалады. Адамзаттың Абайын жырлауға ең үздік жыр сүлейлері қатысты. 6 жұпқа бөлінген 12 ақын жырдан шашу шашты.
Өтеш Ахметов, көрермен:
Айтыстың бағасын енді көрермендер, жалпы жұртшылық береді. Алғашқы сәттен-ақ байқағанымыз – деңгейі өте жоғары өтіп жатыр. Бұл – жай ғана шара емес, Абайдың 180 жылдығына арналған, мағынасы зор, мазмұны терең іс-шара деп ойлаймын.
Айбек Жеңісқазин, айтыскер ақын:
Абай атамыздың тойы – алты Алаштың тойы, құтты болсын! Он күннен бері Семейдің даласы мен ауасы Абай жырларымен тербеліп тұрғандай. Елдің де пейілі мен тілегі осы. Мұнда жеңу не жеңілу мақсат емес, бастысы – елдің абыройы, Абай атамыздың тойы.
Ақындардың ақыны, адамзаттың асылы — Абайды әр айтыскер өзінше жырға қосты. Қоғамның өзекті мәселесін тілге тиек етті. Қайта жаңғырған Абай облысының ахуалын шумақтады. Жыр жүйріктері, бастысы оза шауып бәйгелі болу емес, Адамзаттың Абайына тағзым ету — дейді.
Мұхтар Ниязов, айтыскер ақын:
Біздің көркем шығармаларымыздың негізгі кейіпкерлері, оқиғалары өткен жерлер мен тарихи орындарының бәрі – осы Абай елі. Сондықтан бұл жерге келген сайын топырағын толқып басамыз. Жүрегімізге ерекше ыстық мекен. Абай сүйенгені – үлкен ақиқат болғандықтан, ол шығыста күнмен бірге атқан Абай, батыстан күн батқанша оқылады деп ойлаймын. Сондықтан Абаймен бірге, Абай елі де жасай берсін.
Жанжігіт Омархан, облыстық Мәдениет және тілдерді дамыту басқармасының бастығы:
Ауызымен құс тістеген жүйрік ақындарымыздың бәрі қатысып жатыр. Олардың тең жартысы – «Алтын домбыра» иегерлері. Ертістің жағасында, Алаштың қаласында шаппағанда, қайда шабамыз деп, бәрі де бабын да, бағын да сынауға келіп тұр деп ойлаймын. Біздің міндетіміз – ұйымдастыру.
Суырып салмалардың үздігі атанып бас жүлдеге ие болған қарағандылық Мақсат Ақановқа темір тұлпар бұйырды. Жырымен көпті тамсандырып, алға суырылып шыққандарға ақшалай сый берілді. Бірінші орынды Рүстем Қайыртай еншілесе, екінші орынды Мейрамбек Сұлтанхан мен Айбек Жеңісқазин бөлісті. Жансая Мусина мен Әсем Ереже жыр бәйгесінде үшінші орынға ие болды.
Ержан Жақып
