Құрылысшы күні қарсаңында Премьер-министр Олжас Бектенов Мемлекет басшысы Қасым-Жомарт Тоқаевтың атынан сала мамандары мен ардагерлерін кәсіби мерекелерімен құттықтап, мемлекеттік наградалар табыстады.
Бұлттармен таласқан көрікті ғимараттар, кең жолдар және саябақтар. Осының бәрі құрылысшылардың еңбегі. Аптап ыстық пен қара суыққа, жаңбыр мен қарға қарамай тынымсыз тер төгіп, темір мен тасқа жан бітірген мамандық иелері бүгін марапатталды. Бірқатар құрылысшыға төсбелгі тағылды.
Мұратбек Байтелиев, ардагер құрылысшы:
Еңбегіміз бағаланып, сонша жыл құрылысты басқарып, жұмыс істеп келе жатырмыз. Еліміздің гүлденуіне, өркендеп өсуіне өз үлесімізді қостық деп есептейміз. Түркістан облысында құрылыс өте көп. Өткен жылы жайлы мектептерді елге тапсырдық. Барлық құрылысшыларды Құрылысшы күнімен құттықтаймын.
Премьер-министр ел экономикасы үшін құрылыс секторының маңызы ерек деді. Бүгінде Қазақстанның ЖІӨ-дегі саланың үлесі 6%-ға жетті. Өткен жылдың өзінде ауданы 19 млн шаршы метрден асатын 170 мыңнан астам тұрғын үй пайдалануға берілді. Осы жылдың бірінші жартыжылдығында – 120 мектеп пен балабақша, 30 денсаулық сақтау нысаны салынды.
Бақытжан Жүнісбеков, ҚР Өнеркәсіп және құрылыс министрлігінің комитет төрағасы:
Бас қаламыздың көркейіп келе жатқанын барлығыңыз көріп, біліп жүрсіздер. Құрылысшыларымыз аянбай еңбек етіп жатыр. ЛРТ-ны салып жатқандардың біразы — отандық мамандар. Бүгін құрылысы басталған Алматы облысындағы атом электр стансасын тұрғызуға да біршама қазақстандық құрылысшы жұмылдырылады. Бұқтырма су қоймасындағы көпірді айтуға болады, жолдар салынып жатыр. Құрылысшылардың еңбегі орасан.
Өнеркәсіп және құрылыс министрі де құрылысшыларды құттықтап, оларға «Парасат», «Құрмет» ордендерін, «Ерен еңбегі үшін» медальдарын табыстады. Сондай-ақ биыл алғаш рет Мемлекет басшысының бастамасымен сала ардагерлеріне «Қазақстанның еңбек сіңірген құрылысшысы» құрметті атағы берілді.
Мақсат Сәдуақасов, құрылысшы:
Бүгінгі марапат — үлкен мотивация. Президентіміздің біз сияқты жас кәсіпкерлерге деген жылы лебізі өте тамаша. Сезімімді сөзбен айтып жеткізе алмаймын.
Бүгінде еліміздің құрылыс саласында 1 млн-ға жуық адам еңбек етеді. Олардың орташа жалақысы 400 мың теңгеден асады, дейді министрлік өкілдері. Айта кету керек, қазір Мәжіліс депутаттары Құрылыс кодексіне өзгерістер енгізіп жатыр. Оған сай қала құрылысы саласын реформалау, нысандарды салу және пайдалануға беру процесін оңтайландыру сынды бірнеше маңызды түзетулер жасалады.
Нұрсұлтан Тілектес
