Маманның айтуынша, әншідей сымбатқа қол жеткізу үшін тек спортпен шұғылдану жеткіліксіз – оған қоса әсер ететін бірқатар маңызды факторлар бар.
Нутрициолог әрі фитнес жаттықтырушы Айжан Қалымова не себепті бүгін жаттығуды бастайтын әйелдердің 90 пайызы Дженнифер Лопес секілді мінсіз мүсінге жете алмайтынын түсіндірді. Маманның айтуынша, әншідей сымбатқа қол жеткізу үшін тек спортпен шұғылдану жеткіліксіз – оған қоса әсер ететін бірқатар маңызды факторлар бар. Тәртіп – табысқа апарар басты шарт, бірақ ол жалғыз өзі жеткіліксіз.
"Иә, көпшілік: "Барлығы тәртіпке байланысты" дейді. Мен де келісемін – тәртіпсіз ешқайда бара алмайсың. Бірақ бір ғана жаттығумен шектелу – үлкен қателік", – деді ол.
Айжанның пікірінше, әйелдердің басым бөлігі спортқа кіріскен бойда тез арада нәтиже көремін деп үміттенеді.
"Көп адам залға барып, бір айдан кейін айнадан мүлде өзгерген бейнені көремін деп ойлайды. Немесе бір апталық қатаң диета ұстаса болды, денесі бірден өзгеріп кетеді деп сенеді. Бірақ адам ағзасы – қысқа мерзімді әрекетке жауап беретін қарапайым механизм емес. Бұл – ұзақ уақыт бойы жиналатын, жылдармен қалыптасатын нәтиже. Нағыз өзгеріс – жүйелі еңбектің, тұрақты әдеттің, өз денеңе жан-жақты күтім жасаудың жемісі", – деп түсіндірді Қалымова.
Оқи отырыңыз: Алматыда Дженнифер Лопестің концертіне байланысты бірнеше көше жабылады
Маманның айтуынша, мінсіз мүсінге жету үшін тек физикалық жаттығу жеткіліксіз.
"Дженнифер Лопестің мүсіні – тек спорттың емес, бүкіл өмір салтының нәтижесі. Оған дұрыс тамақтану, жеткілікті ұйқы, эмоциялық тепе-теңдік, денсаулықты тұрақты бақылау және зиянды әдеттерден арылу қатар әсер етеді. Егер бұл факторлардың бірін елемесеңіз, нәтиже де ойдағыдай болмайды", – деді ол сөзін қорытындылай келе.
Дженнифер Лопестің біз көріп жүрген сымбаты – сиқыр емес. Бұл – жүйелі тәсілдің жемісі, оған мыналар кіреді, дейді маман:
- Тамақтану – тепе-тең, "аз жесем – арықтаймын" деген түсініктен арылған.
- Жаттығулар – шамадан тыс жүктемесіз, бірақ тұрақты.
- Ұйқы – кем дегенде 7-8 сағат, әйтпесе ағза толық қалпына келмейді.
- Психоэмоциялық күй – үнемі күйзелісте болсаң, дене артық салмақты жібермейді.
- Алкоголь мен темекіден бас тарту – бұл гормондарға да, зат алмасуға да әсер етеді.
- Медициналық тексерулер – ағзаның жағдайын біліп, прогреске не кедергі екенін анықтау үшін.
Айжан Қалымова көпшіліктің сымбатқа жету жолындағы басты қателігін атап өтті. Оның айтуынша, адамдардың көбі салауатты өмір салтының негізгі қағидаларын жақсы біледі, бірақ бәрін толық орындамайды.
"Көп адам осының бәрін біледі. Иә, мен кездескен әрбір әйел дұрыс тамақтану, тұрақты жаттығу, жеткілікті ұйқы, күйзелісті азайту сияқты факторлардың маңызын мойындайды. Бірі тек спортпен айналысып, тамақтануға мән бермейді. Енді бірі керісінше – тамағын қадағалайды да, қимыл-қозғалысты ұмытады. Ал кейбірі түн ортасына дейін ұйықтамай, таңертең өзін шаршаңқы сезінеді", – деп мысал келтірді ол.
Оқи отырыңыз: Қазақстандықтар Дженнифер Лопес туралы не білгісі келеді
Маманның сөзінше, дәл осындай жағдайда адамдар жиі таңқалады. Сондай-ақ, ол дененің өзгеруі үшін үш негізгі қағиданы атап өтті.
"Сосын маған келіп: "Нәтиже қайда? Неге мен өзгере алмай жүрмін?" – деп сұрайды. Бірақ нәтиже бір қырынан ғана емес, кешенді тәсілден туады. Біріншіден, өзіңе жан-жақты қарау керек. Екіншіден, өзіңе уақыт беруді үйрену маңызды. Үшіншіден, асықпай, бірақ тұрақты әрекет ету керек. Нағыз өзгеріс – бір күннің емес, күн сайынғы жүйелі еңбектің жемісі. Бүгін жасаған әрбір кішкентай қадамың ертең үлкен нәтижеге айналады", – дейді Қалымова.
