Алматы қаласының мәслихатының кезектен тыс XXXII сессиясында қалалық басқару құрылымына өзгерістер енгізу мәселесі қаралды.
Сессияда сөз сөйлеген қала әкімінің аппаратының басшысы Ерлан Исабеков қазіргі таңда Алматыда 8 аудандық әкімдік пен 24 басқарма жұмыс істеп жатқанын айтты. Ол Үкімет бекіткен бірыңғай құрылымға сай болу үшін және басқарма атауларын жеңіл әрі түсінікті ету мақсатында 4 басқарманың атауын өзгерту жөнінде ұсыныс жасады:
- Қоғамдық даму басқармасы – Ішкі саясат басқармасы болып өзгереді;
- Қалалық жоспарлау және урбанистика басқармасы – Сәулет және қала құрылысы басқармасы болып аталады;
- Сейсмикалық қауіпсіздік және мобилизациялық дайындық басқармасы –Мобилизациялық дайындық, аумақтық және азаматтық қорғаныс басқармасы болып қайта құрылмақ;
- Коммуналдық инфрақұрылымды дамыту басқармасы – Коммуналдық инфрақұрылым және тұрғын үй инспекциясы басқармасы болып өзгереді.
Бұдан бөлек, Қаржы және экономика басқармалары біріктіріліп, жаңа Экономика және қаржы басқармасы құрылатын болды.
Қалалық мобильділік басқармасы екі жеке құрылымға бөлінеді:
- Жол қозғалысын ұйымдастыру және жолаушылар көлігі басқармасы;
- Жол инфрақұрылымын дамыту басқармасы.
Бұл өзгерістерге мәслихат депутаттары қолдау білдірді.
Айта кетейік, өткен жылы Алматыда екі жаңа басқарма – Сейсмикалық қауіпсіздік және жұмылдыру дайындығы басқармасы мен Қоғамдық кеңістіктерді дамыту басқармасы құрылған болатын.
