Қостанай облысының Амангелді ауданында тасқын шайып кеткен жол әлі жөнделмеген. Жол бойындағы бірнеше елді мекенде 2000-ға жуық адам тұрады. Уақытша салынған өткел сәл ылғал тисе ми-батпаққа айналады. Тұрғындар қыс түскенше жағдай оңалмаса, көктемде қатынассыз қаламыз ба деп алаңдайды. Мәдина Нағашыбай тарқатады.

Мәдина Нағашыбай, тілші:

Бұл – Үрпек, Қабырға ауылдарын аудан орталығы Амангелдімен жалғайтын жалғыз жол. Әрі Қостанай мен Арқалыққа да осы бағыт апарады.

Былтыр тасқын тас жолды шайып кетті. Биыл да нөпір су келген соң, көтеріп қойған жерінен тағы да қолдан жыруға тура келді

Мәдина Нағашыбай, тілші:

Кейін қатынас үшін қалпына келтірілді. Алайда тұрғындар жолды талапқа сай жөндеп беруді сұрайды.

Аманжол Дүйсенбин, Үрпек ауылының тұрғыны:

Жаңбырда жүре алмаймыз, ертең қыс болса құлаймыз ғой. Екі жағын көрдіңіз ғой, жар. Машинамыз күнде бұзылады. Жол жаман. Осыны дұрыстап берсе, бар айтарымыз сол.

Думан Едіге, Үрпек ауылының тұрғыны:

Мынадай жолда машина, техника да қажиды. Біз қалтамыздан тапқан-таянған ақшамызды осыған саламыз. Бұрынғы салған асфальті жатыр. Су көтеріп тастады. Бұл енді табиғи апат, сонда да бірақ екінші жылға кетіп бара жатыр. Істеу керек қой.

Тасқыннан кейін ауылдың электр желілерінен де қайта-қайта ақау шыға бастаған.

Роза Дүйсенбай, Үрпек ауылының тұрғыны:

Алты айдың ала жазында жарық сөне береді. Өте шаршатты. Вайфай бәрі жанып кетті. Телевизорымыз кетті. Қазір сәл жел болса, сөніп қала береді.

Әкімдіктің айтуынша, бұған себеп – желінің 90 пайызы тозған. Жарыққа жауапты ұйым ақау шыққан сайын жөндеп отырады. Ал Үрпек ауылының жолын жөндеуге биыл 329 млн теңге қаражат жұмсалмақ. Үстіне қиыршық тас төселіп, келер жылы қаржы бөлінсе, асфальтталуы тиіс.

Қанат Кеделбаев, Амангелді ауданының әкімі:

Қаржы берілді. Енді осы бір жетінің шамасында осы жолды бастап кетеміз. Екі-үш айдың көлемінде деңгейін 1,2 метрге көтере отырып, қайтадан үстін қиыршық тас шабындысын төсеп, биыл жұмыс жасаймыз. Қосымша екі жерден суағар дайындаймыз.

Жалпы Амангелді, Жангелді ауданындағы елді мекендердің деніне ешқашан тас жол салынбаған. Ұлт ұстазы Ахмет Байтұрсынұлы ауылына 2022 жылы 107 шақырымның 27 шақырымына асфальт төселген еді. Алайда оны да былтыр тасқын бірнеше жерден бұзып, шайып әкетті. Қалған 80 шақырымға сол күйі тас төселмей қалды.

Әділхан Ахметов, Қостанай облысы Жолаушылар көлігі және автомобиль жолдары басқармасы басшысының орынбасары:

Шұбалаң-Қарасу бағытына жататын бұл жолдың 57 және 107 шақырымына дейінгі аумақ жөнделіп жатыр. Қазір 20 км жеріне қиыршық тас төселді. Сондай-ақ Міржақып Дулатұлының 140 жылдығына орай Бидайық, Саға ауылдарының көшелерін жөндеуге 117 және 370 млн, ал Тоқанай-Саға- Алтынсарин және Саға-Бидайық бағыттарына 1 млрд-тан астам қаржы бөлінді.

Бұл жолдардың бәріне асфальт емес, әзірге құр қиыршық тас төселіп жатыр. Жалпы биыл облыс жолдарын жөндеуге 102 млрд теңге бөлінсе, оның 7 млрд теңгеден астамы Амангелді, Жангелдин аудандарына тиесілі.

Мәдина Нағашыбай