Мәдениет және ақпарат министрлігінің ұйытқы болуымен Ұлттық академиялық кітапханада «Абай жолы» кейіпкерлері және Абай», «Абай. Стихи и поэмы» атты жаңа кітаптардың тұсаукесер рәсімі ұйымдастырылды, деп жазады Egemen.kz.
Мәдени шараға қоғам қайраткерлері, абайтанушылар, әдебиеттанушылар мен ақын-жазушылар қатысты.
Жазушы Алмахан Мұхаметқалиқызының «Абай жолы» кейіпкерлері және Абай» еңбегі романдағы кейіпкерлердің туыстық, тарихи, рулармен байланысын жүйелі түрде талдай отырып, көркем образдар мен тарихи тұлғалардың байланысын зерделейді. Кітап ұстаздар мен студенттерге және оқушыларға көмекші құрал ретінде ұсынылады.
Сонымен қатар ақын-аудармашы Орынбай Жанайдардың «Абай. Стихи и поэмы» жинағында ұлы ақын Абай Құнанбайұлының таңдаулы өлеңдері мен поэмалары орыс тілінде жарияланған. Жаңа басылым ұлы ақынның мұрасын көпшілікке насихаттауға бағытталған.
Аталған кітаптар мемлекеттік тапсырыс арқылы 3000 данамен жарық көрген. Жаңа кітаптар республикадағы кітапханаларға таратылады.
