2025 жылғы 7 тамызда Үкіметтегі баспасөз мәслихатында Премьер-министрдің орынбасары Қанат Бозымбаев Ақтау маңында құлаған AZAL ұшағының апат себептерін анықтау үшін тағы екі сараптаманың нәтижелері күтіліп жатқанын айтты, деп хабарлайды Zakon.kz тілшісі.
Вице-премьер тергеу барысында Әзербайжан, Ресей тараптарынан да, ұшақ өндіруші компания тарапынан да ешқандай құпия жоқ екенін атап өтті.
"Біз бәрін Көлік министрлігінің жанындағы комиссия аясында атқарып жатырмыз. Комиссия құрамында барлық сарапшылар, мамандар бар. Олар үнемі бізге – Астанаға, сондай-ақ Ақтауға келіп-кетіп тұрады. Бұл жерде ешқандай мәселе көріп тұрған жоқпыз. Ақпанда алдын ала есеп жариялағанымызды білесіздер, ол біршама түсінік берді. Интернетте тараған кейбір жорамалдарды сол есеп реттеді. Комиссия Бакуге барды, онда AZAL әуе компаниясы мен әуе кемелеріне техникалық қызмет көрсететін SilkWay Technics өкілдерімен жұмыс кездесулері өтті. Қажетті құжаттарды жинап, талдау жүргізу керек болды", – деді Қанат Бозымбаев.
Оның айтуынша, сәуір айы бойы Әзербайжан, Ресей, Embraer компаниясы мен ИКАО-ның уәкілетті өкілдері мен кеңесшілері арасында кездесулер өткен.
"Олар қалпына келтіру бойынша шешім қабылдады, яғни №2 гидравликалық жүйе құрылымын қайтадан құрастыру, сондай-ақ авионика модульдік блогын жабдықты жасаушыға зерттеуге жіберу туралы шешім қабылданды. Гидравликалық жүйеге сараптама жүргізу – ол неге іске қосылмады, неге қанатшалар (закрылки) жұмысын тоқтатты деген сұрақтарға жауап іздеу керек болды. Мамыр айында комиссия жұмыс кездесулерін өткізу және Грозный әуежайының аэронавигациялық жүйе нысандарын аралау үшін Грозный мен Ростов-на-Донуға барды", – деп толықтырды Қанат Бозымбаев.
Оның айтуынша, бірлескен шешімдер қабылдауды үйлестіру мақсатында авиациялық модульдік блок пен GPS – жаһандық позициялау жүйесіне қатысты Бразилия, Ресей, Әзербайжан тараптарымен онлайн-конференция ұйымдастырылған.
"Осы модульдік авиациялық блок АҚШ-тың Аризона штаты, Феникс қаласына жіберілді. Қазір біз олардан талдау нәтижесін күтіп отырмыз. Құжаттарды зерттеу, есептерді қалыптастыру жалғасуда. Үш қосалқы комиссия бар, солар бойынша бөлек есептер жасалады. Осы есептер қалыптасып, барлық сараптамалар аяқталғаннан кейін комиссия бірнеше ай ішінде қорытынды есеп жазуға кіріседі. Жалпы, бұл – ИКАО талап ететін қалыпты тәжірибе, бір жыл ішінде тергеуді толық аяқтау керек. Өкінішке қарай, бұл тек бір тарапқа ғана емес, 3-4 тарапқа қатысты. Соған қарамастан, биыл қорытынды есепті жариялауға тырысамыз", – деп жалғастырды Қанат Бозымбаев.
Ол фюзеляждың ішінен сыртқы заттардың сынықтары табылғанын, олардың түгелдей тергеу-жедел тобы тарапынан алынып, Бас прокуратураның жарылғыш заттар бойынша криминалистикалық сараптамаға жіберілгенін айтты.
"Біз осы сараптаманың аяқталуын күтіп отырмыз. Бұл сараптама нәтижесінде нақты не болғанын айтуға болады. Ал визуалды тексеру аясында – мен өз көзіммен бұл тесіктерді көрдім, қолыммен ұстап көрдім. Сондықтан кез келген қорытынды тек криминалистикалық және жарылыс-техникалық сараптама негізінде жасалады. Ұшақтың қашан зақым алғанын білеміз, бірақ не себептен – әзірге белгісіз. Соған нақты жауап беру үшін құқық қорғау органдары тарапынан жүргізіліп жатқан екі сараптаманың нәтижесі қажет", – деді Қанат Бозымбаев.
2024 жылғы 25 желтоқсан күні таңертең Бакуден Грозныйға бет алған Azerbaijan Airlines (AZAL) компаниясының Embraer 190 ұшағы Ақтау маңында апатқа ұшырады. Әуе компаниясының мәліметінше, бортта 62 жолаушы мен 5 экипаж мүшесі болған. 29 адам аман қалған.
