Текеліде газтурбиналық станса салынып жатыр. Жаңа нысан қаланы қосымша электр және жылу энергиясымен қамтамасыз етеді .
Кеншілер қаласы қазір жылу маусымына дайындық қызу. Инженерлік инфрақұрылым жаңартылып, жылу желілері жөнделіп жатыр.
Текелідегі энергокешен өткен ғасырдың ортасында салынған. Ескірсе де, үзілісіз жұмыс істеп, қаланы жылу және электр қуатымен қамтамасыз етіп тұр. Қазандықтар 4 жыл сайын жөндеуден өтеді. Қыста энергия шығыны ұлғаяды. Кәсіпорынның қуаттылығын арттыру мақсатында биыл газтурбиналық станцияның құрылысы басталды.
Игорь Шацкий, Текелі энергокешенінің директоры:
- Бұл газтурбиналық станция резервтік әрі қосалқы энергия көзі ретінде қарастырылып отыр. Оның көмегімен қазіргі көміртозаңды бекетті жаңғырту үшін уақытша тоқтатуға мүмкіндік береді. Осы кезеңді пайдаланып, жөндеу жұмыстарын жүргізіп аламыз. Бұл болашақта станцияның тұрақты жұмыс істеуіне жол ашады.
Ескі жылу желілеріне артық салмақ түспеуі үшін Текелі қаласында үшінші жыл қатарынан жаңарту жұмыстары жүргізілуде. Қазір қаладағы шағын аудандардың бірінде тозығы жеткен құбырлар ауыстырылып жатыр. Мамандардың айтуынша, бұл шаралар алдағы жылыту маусымын апатсыз өткізуге және жылу жүйесінің тиімділігін арттыруға бағытталған.
Дмитрий Клоков, қала тұрғыны:
- Бұл құбырлар шамамен 40 жылдан бері ауыстырылмаған. Қазір қалада ауқымды жұмыстар атқарылып жатыр. Құбырлар жаңартылып, алаңдар абаттандырылуда. Енді жолдар да жөнделсе, бәрі жақсы болады деп ойлаймын.
Иван Сафонов, мердігер компания өкілі:
- Алатау шағын ауданы бойынша құбырлардың жалпы ұзындығы 17 мың метрді құрайды. Қазіргі таңда соның 16 500 метрі жаңартылып, тек 500 метрі ғана қалды. Құрылыс-монтаждау жұмыстарын қазан айына дейін толық аяқтауды жоспарлап отырмыз.
Текелі қаласы бойынша жылу желілерінің жалпы ұзындығы 79 шақырым. Олар кезең-кезеңімен жаңартылады.
Ерлан Жетібаев, қала әкімінің орынбасары:
- Келешекте жобалық-сметалық құжаттама Металлург шағын ауданына дайындалды. Бүгінгі күні мемлекеттік сараптамадан өтуде, 20 шақырым, 300 метр. Болашақта сол жұмыстар да жалғасын табады.
Бүгінгі таңда облыс бойынша жаңартылуы тиіс 16 шақырым жылу желісінің 11 шақырымы ауыстырылды. Сонымен қатар алдағы жылыту маусымын қиындықсыз өткізу үшін бюджеттік ұйымдарға 293 мың тонна көмір қажет болса, соның 290 мың тоннасы дайындалды.
