"Шымкент әкімінің орынбасарына оқ жаудырды" делінген күдікті сол күні мас болмағанын айтты .
Оның сөзінше, тергеу кезінде өзге мәліметтерді қысыммен ғана берген, деп хабарлайды inbusiness.kz сайты tengrinews.kz-ке сілтеме жасап.
Себебі, Ернар Жиембай "өмір бойы бас бостандығыңнан айырыласың" деген сөздерден қатты қорыққан.
Ол бүгінгі сот отырысында көпшілікті дүр сілкіндіретін мәлімдемелер жасады.
Ернар Жиембайдың айтуынша, жәбірленуші Руслан Берденов одан қала әкімін тапсырыс беруші ретінде көрсетуін сұраған көрінеді.
– Ең таңғаларлығы – ол (Руслан Берденовті айтады) менен өзіне қастандық жасау туралы тапсырманы қала әкімі Ғабит Сыздықбеков аппарат басшысы арқылы берген деп айтуымды өтінді. Яғни, мені киллер ретінде жалдағысы келген. Ол (Берденовті айтады) мені тіпті о дүниеден де алып шығамын деп уәде берді, – деді айыпталушы.
Сол-ақ екен, оның сөзі үзіліп, прокурор судьядан сұрақтарға көшуін сұраған.
"Құрметті төраға, айыпталушы іс бойынша қатысы жоқ мәліметтер айтып отыр. Егер ол жауабын аяқтаса, сұрақтарға көшуді сұраймын" деп сөзін нақтылаған прокурор.
Сотталушы "Әкімнің бұл іске қатысы жоқ" деп сөзін түйіндеген.
Осыған дейін Руслан Берденовке оқ жаудырған азамат сотта өз шындығын айтқан еді.
